მძლეოსნობის რესპუბლიკური ჩემპიონატი ახალციხეში

ახალციხის ღია პირველობა, მიხეილ იაძის სახელობის სტადიონზე, გუშინ, 4 მაისს მოეწყო. სხვადასხვა ასაკობრივ ჯგუფში გაერთიანებული მონაწილეები, ერთმანეთს მძლეოსნობის სხვადასხვა კატეგორიაში დაუპირისპირდნენ.

მძლეოსნობის ათ სახეობაში 60 პრიზიორი გამოვლინდა. ოცი პირველადგილოსანი, ოცი მეორეადგილოსანი და ოცი მესამეადგილოსანი. გამარჯვებულებს ოქროს, ვერცხლისა და ბრინჯაოს მედლები, ასევე სერტიფიკატები და ფასიანი საჩუქრები გადაეცათ.

თბილისის გუნდის წევრმა ბადრი ქიმაძემ ორი ოქროს მედალი მოიპოვა. მან პირველი ადგილი დაიკავა ბადროს ტყორცნასა და ბირთვის კვრაში: „გამარჯვებას ნამდვილად ველოდებოდი, რადგან დიდი შრომა გვაქვს ჩადებული ამაში მე და ჩემს მწვრთნელს. ვემზადები ევროპის ჩემპიონატისათვის“.

1998 წლიან ბიჭების კატეგორიაში, 500 მეტრ მანძილზე რბენაში, დაიკავა პირველი ადგილი ახალციხელმა მინდია ენდელაძემ.

„გამარჯვებას ველოდი, კარგად ვიყავი მომზადებული“, – გვითხრა მინდიამ.

ჯამში, ახალციხელმა სპორტსმენებმა ჩემპიონატზე 14 მედალი მოიპოვეს: 4 ოქრო,5 ვერცხლი და 5 ბრინჯაო.

ჩემპიონატი მძლეოსნობის სპორტული კლუბისა და ახალციხის მერიის ორგანიზებით მოეწყო.

ახალციხის მძლეოსნობის სპორტული კლუბის დირექტორის ზიგმუნდ ზილბერშტეინის განცხადებით, ამ ტურნირზე ორი რეკორდი დამყარდა: უროს ტყორცნაში და სტადიონზე ბირთვის კვრაში.

[მარიამ ბარძიმაძე, ახალციხე]