პედაგოგებისთვის საგნობრივი გამოცდები დაიწყო

მთელი საქართველოს მასშტაბით მასწავლებელთა სასერთიფიკაციო გამოცდებისთვის ტესტირება დღეს საგნობრივ ნაწილში დაიწყო. ახალციხის საგამოცდო ცენტრში ქართული ენისა და ლიტერატურის პირველ სესიაზე დარეგისტრირებული 147 მასწავლებლიდან გამოცდაზე 22 არ გამოცხადდა.

მასწავლებელთა ტესტირების პარალელურად მიმდინარეობს აბიტურიენტების გამოცდაც, რომლებიც დღეს ერთ-ერთ არჩევით საგანს ლიტერატურას აბარებენ. ახალციხის საგამოცდო ცენტრის ადმინისტრატორის გელა ინასარიძის თქმით, 190 აბიტურიენტიდან გამოცდაზე მხოლოდ 4 არ გამოცხადდა: ” გამოცდები მშვიდ ვითარებაში მიმდინარეობს და ამ დრომდე ყოველგვარი ექსცესებისა და დარღვევების გარეშე ჩაიარა”.

მეორე სესიაზე დღეს ზოგადი უნარების გამოცდას სტუდენტები ჩააბარებენ, რომლებიც ტესტირებას გრანტის გასაუმჯობესებლად გაივლიან. მეორე სესია 15:00 საათზე დაიწყება. სტუდენტთა საგრანტო გამოცდაზე ახალციხის საგამოცდო ცენტრში სულ 57 სტუდენტია დარეგიტრირებული.

[თამარ თოთაძე, ახალციხე]