ახალციხეში მასწავლებელთა სასერთიფიკაციო გამოცდიდან ერთი პედაგოგი მოხსნეს

ერთიანი ეროვნული და საერთო სამაგისტრო გამოცდების პარალელურად, დღეს, 15 ივლისს მასწავლებელთა სასერთიფიკაციო გამოცდები დაიწყო. მასწავლებლები დღეს გამოცდას ბიოლოგიაში, ხელოვნებაში, ფიზიკასა და სამოქალაქო განათლებაში აბარებდნენ.

15 ივლისს მასწავლებელთა სასერთიფიკაციო გამოცდა ერთ სესიად ჩატარდა. ახალციხის საგამოცდო ცენტრში დარეგისტრირებული 72 მასწავლებლიდან გამოცდაზე 22 არ გამოცხადდა. ერთი პედაგოგი კი გამოცდიდან მოიხსნა. როგორც ახალციხის საგამოცდო ცენტრის ადმინისტრატორი გელა ინასარიძე განმარტავს, ერთ–ერთმა მასწავლებელმა მოქცევის წესი დაარღვია, მას გამოცდაზე მობილური ტელეფონი ჰქონდა, რის გამოც გამოცდიდან მოიხსნა.

მასწავლებელთა სასერთიფიკაციო გამოცდის პარალელურად დღეს აბიტურიენტები მათემატიკის გამოცდას აბარებენ. პირველ სესიაზე დარეგისტრირებული 105 აბიტურიენტიდან გამოცდაზე 1 არ გამოცხადდა. მათემატიკის გამოცდის მეორე სესია 15:00 საათზე იწყება.

შეგახსენებთ, რომ გამოცდები ახალციხის მეხუთე საჯარო სკოლის შენობაში მიმდინარეობს.

[თამარ თოთაძე, ახალციხე]