ახალციხე რეგიონებში განსახორციელებელი პროექტების ფონდიდან 3,234,685 ლარს მიიღებს

ადგილობრივი ხელისუფლების მიერ 2014 წელს ინფრასტრუქტურის გაუმჯობესებისთვის პრიორიტეტად დასახელდა ახალციხეში შიდა გზების მოწესრიგება, სასმელი და საკანალიზაციო სისტემის გამართვა. ასევე, ახალციხის მუნიციპალიტეტში არსებულ რამდენიმე სოფელში საგზაო ინფრასტრუქტურის რეაბილიტაცია.

რეგიონებში განსახორციელებელი პროექტების ფონდიდან ახალციხეში ფინანსდება გვარამაძის ქუჩის გზის, სასმელი წყლის და საკანალიზაციო სისტემის მოწყობა - რეაბილიტაციის სამუშაოები, ასევე, გვარამაძის ქუჩაზე მდებარე გადასასვლელის რეაბილიტაცია.

პროექტების ფარგლებში იგეგმება ახალციხის მუნიციპალიტეტის სოფლების - პამაჯი-წყალთბილის ცენტრალური გზისა და სოფელ ღრელის ცენტრალური გზის მოასფალტება.

პროექტები ახალციხის მუნიციპალიტეტის ადგილობრივი თვითმმართველობის მიერაა შერჩეული.
შესრულებულ სამუშაოებს მონიტორინგს საქართველოს რეგიონული განვითარებისა და ინფრასტრუქტურის სამინისტრო გაუწევს.

აღნიშნულ ინფორმაციას საქართველოს რეგიონული განვითავრების სამინისტრო აქვეყნებს.

შეგახსენებთ, 2013 წელს რეგიონული განვითარების სამინისტრომ ორივე ეტაპზე ახალციხეს ჯამში 19 პროექტი დაუფინანსა. ამათგან სამი პროექტის დასრულება 2013 წელს ვერ მოესწრო.

[sknews.ge]