სამცხე-ჯავახეთში დირექტორობის უფლება 23 კანდიდატს აქვს

იმ პირებისთვის, რომლებმაც 2013 წელს წარმატებით გაიარეს საჯარო სკოლის დირექტორის შესარჩევი კონკურსი და დირექტორობის უფლება მოიპოვეს დღეიდან, 11 თებერვლიდან, სერტიფიკატების გადაცემა დაიწყო. სამცხე-ჯავახეთში სერთიფიკატი 23 ადამიანს გადაეცემა.

სამცხე-ჯავახეთის მასშტაბით 2013 წელს ახალციხის საგამოცდო ცენტრში ტესტირებაგავლილი მსურველებიდან დირექტორობის უფლება 13-მა მიიღო, ასპინძის საგამოცდო ცენტრში ოთხმა, ბორჯომში ხუთმა, ნინოწმინდაში კი ერთმა მსრუველმა.

ახალციხის მეექვსე საჯარო სკოლის დირექტორის მოვალეობის შემსრულებელი ზაზა თამარაშვილი ერთ-ერთია მათ შორის, ვინც დირექტორობის უფლება მოიპოვა.

„სერტიფიცირების პირველი ეტაპი რომ გავიარეთ, კომპიუტერმა მაშინვე მოგვცა შედეგები, ვიცოდით ვინ გადალახა პირველი ეტაპი და ვინ ვერა, ამის შემდგომ გვქონდა გასაუბრება. 2007 წელს ჩაბარებული მქონდა ტესტირებაც და გასაუბრებაც, ამიტომ არ გამჭირვებია იმ კითხვებზე პასუხების გაცემა, რაც გასაუბრებაზე იყო“, - ამბობს ზაზა თამარაშვილი.

მისივე თქმით, დირექტორობის უფლების მინიჭება არ ნიშნავს რომ უკვე დირექტორია: "ახლა ყველა ვართ დირექტორის მოვალეობის შემსრულებელი. პროცედურა ითვალისწინებს იმას, რომ მინისტრმა წარადგინოს კადნიდატურა და საბოლოო ჯამში სამეურვეო საბჭომ აირჩიოს ესა თუ ის პიროვნება სკოლის დირექტორად“.

ახალციხის პირველი საჯარო სკოლის დირექტორის მოვალეობის შემსრულებელმა მაკა ჯანაშვილმა სერტიფიცირება წარმატებით გაიარა და მაღალი ქულები მიიღო. თუმცა, საქართველოს განათლებისა და მეცნიერების სამინისტროს მიერ გამოქვეყნებულ სიაში ვერ მოხვდა.

„საკმაოდ რთული გამოცდა იყო, მოიცავდა ფსიქოლოგიურ საკითხებს, პროფესიულ უნარებს, კანონმდებლობას, ზოგად უნარებს და ასე შემდეგ. ფაქტია, რომ ჩავაბარე ნორმალურად და მაღალი ქულა მივიღე, ვერც გასაუბრებაზე ვიტყვი, რომ ცუდად ჩაიარა, პროცესით ნამდვილად არ ვარ უკმაყოფილო, - ამბობს მაკა ჯანაშვილი და ამატებს, რომ თუ გამოცდები ხელმეორედ ჩატარდება, მონაწილეობას მიიღებს, თუმცა, მანაც და ყველა იმ დირექტორმა, ვინც ვერ მოიპოვა დირექტორობის უფლება, უნდა იცოდნენ რა შეცდომა დაუშვეს: დავუშვათ მეორედაც წარმატებით ჩავაბარეთ, მეორედაც გავედით გასაუბრებაზე, ხომ უნდა ვიცოდეთ რას ვერ ვაკეთებთ და როგორ უნდა მოვიქცეთ, რომ გადავლახოთ“.

საქართველოს განათლებისა და მეცნიერების სამინისტრომ იმ ადამიანების სია, რომლებმა წარმატებით დაძლიეს 2013 წლის საჯარო სკოლის დირექტორის შესარჩევი კონკურსის სერტიფიცირების ეტაპი და დირექტორობის უფლება მოიპოვეს 7 თებერვალს გამოაქვეყნა. დღეიდან, 11 თებერვლიდან კი მათ უკვე შეუძლიათ იმ საგანმანათლებლო რესურსცენტრებს მიმართონ, სადაც ტესტირება გაიარეს და რომლის სამოქმედო ტერიტორიაზეც საგამოცდო ცენტრი მდებარეობდა და სერტიფიკატები აიღონ.

[თამარ თოთაძე, ახალციხე]