ასპინძაში 2013 წელს დაგეგმილი 4 პროექტიდან, მხოლოდ 2 დაასრულეს

2013 წელს ასპინძაში დაფინანსებული ოთხი პროექტიდან ოთხივე გზების რეაბილიტაციას შეეხებოდა.

• სოფელ აწყვიტაში მისასვლელი გზის რეაბილიტაცია (მოასფალტება) 642, 000 ლარი;
  
• სოფელ ოშორაში მისასვლელი გზის რეაბილიტაცია (მოასფალტება) – 702, 000 ლარი;
  
• დაბა ასპინძაში ჭავჭავაძისა და შალვა ახალციხელის ქუჩების რეაბილიტაცია (მოასფალტება) – 242, 000 ლარი;
  
• სოფელ ხიზაბავრასთან მისასვლელი გზის რეაბილიტაცია 1,100,000 ლარი.

„ოშორის გზა დასრულებულია და ექსპერტიზაზეა გაგზავნილი. ხიზაბავრის გზის პროექტისთვის ტენდერი მილიონ 100 ათასზე იყო გამოცხადებული და 900,000-ად მოიგეს. აქ მხოლოდ ასფალტია დასაგები და სიცივეების გამო სამუშაოები შევაჩერეთ. როგორც კი ამინდები გამოვა, სამუშაოები განახლდება“, - განმარტავს ასპინძის მუნიციპალიტეტის გამგებლის მოადგილე ალექსანდრე პაპაშვილი.

მისივე თქმით, ჯერ არ დასრულებულა დაბაში შიდა გზების რეაბილიტაციაც, რომელიც ასევე უამინდობის გამო შეაჩერეს.

„ამ პროექტზე ერთი პროექტი ჩავარდა, არავინ მიიღო მონაწილეობა, მეორე ტენდერზე გვიან გაფორმდა ხელშეკრულება და აქაც მხოლოდ მოასფალტებაა დარჩენილი. შარშანდელის მსგავსად კარგი ამინდები რომ ყოფილიყო, წელს დასრულდებოდა, მაგრამ, როცა +7 გრადუსზე ნაკლებია ტემპერატურა ასფალტის დაგება არ შეიძლება, ამიტომ შეჩერდა“, - გვიხსნის ალექსანდრე პაპაშვილი.

დარჩენილი ორი პროექტი მიმდინარე, 2014 წელს დასრულდება.

[sknews.ge]