რაში დახარჯავენ ასპინძელები ორ მილიონამდე ლარს

ასპინძის მუნიციპალიტეტში მთავარ პრიორიტეტად სოფლებში მისასვლელი გზების რეაბილიტაცია დასახელდა.

ასპინძის მუნიციპალიტეტის გამგებლის მოადგილე ეკონომიკის და ინფრასტრუქტურის საკითხებში ბესიკ სანდოძე ამ არჩევანს იმით ხსნის, რომ გასულ წელს დაწყებული პროექტები დასამთავრებელი იყო:
„პრიორიტეტად გზების მოასფალტება ავირჩიეთ, ეს იმით იყო გამოწვეული, რომ გასულ წლებში ჩვენ დაწყებული გვქონდა რამდენიმე სოფელში მოასფალტება, თუმცა ბოლომდე ვერ დავასრულეთ“.

სამინისტროსთვის ასპინძის ადგილობრივმა ხელისუფლებამ რვა პროექტი მოამზადა. სამინისტროსგან დაფინანასების თანხმობა ორ პროექტზე მიიღო. გზების რეაბილიტაციისთვის 1,700,000 ლარი დაიხარჯება.

მუნიციპალიტეტის საკრებულოში განმარტავენ, რომ დამტკიცებული პროექტის ფარგლებში, მოასფალტდება გზა სოფელ აწყვიტამდე გზა და დასრულდება იდუმალა-ოშორამდე მისასვლელი გზა. საკრებულოში აკონკრეტებენ, რომ სოფელ აწყვიტის მიმართულებით, ასფალტი დაახლოებით 2 კმ-ზე დაიგება, იდუმალა ოშორის-მონაკვეთზე კი 2.5 კმ-ია დარჩენილი.

ასპინძის მუნიციპალიტეტის საკრებულო რეგიონული განვითარებისა და ინფრასტრუქტურის სამინისტროს რვა პროექტის დასაფინანსებლად დაახლოებით 20 მილიონ ლარს სთხოვდა. საკრებულოში ამბობენ, რომ ყველა პროექტის დაფინანსების შემთხვევაში დაბის შიდა გზებიც მოასფალტდებოდა და სოფლებამდე მისასვლელი გზებიც. დაგეგმილი იყო ახალი, გზის 20-კილომერტიანი მონაკვეთის დაგება სოფელ ჭობარეთამდე.

რაც შეეხება გასულ წლებს, დასრულებული მხოლოდ სოფელ რუსთავის გზაა, დარჩენილია მონაკვეთები მუნიციპალიტეტის სოფლების: იდულამა-ოშორის, სარო- ხიზაბავრის, დამალისა და ტოლოშის მიმართულებით.

საკრებულოში ფიქრობენ, რომ თუ დაფინანსებული პროექტებიდან თანხა დარჩება, დაბის შიდა ქუჩების რეაბილიტაციაც შესაძლებელი გახდება.

[თინათინ ზაზაძე, ასპინძა]