ადიგენში სამი ინფრასტრუქტურული პროექტიდან მხოლოდ ერთი დაასრულეს

საქართველოს რეგიონული განვითარებისა და ინფრასტრუქტურის სამინისტროში, 2013 წელს, ადიგენის მუნიციპალიტეტიდან რვა პროექტი წარადგინეს. უმეტესობა გზების რეაბილიტაციასა და სასმელი წყლის სისტემის მოწესრიგება ეხებოდა. მხოლოდ ერთი პროექტი ითვალისწინებდა ნაპირსამაგრ სამუშაოებს.
წარდგენილი რვა პროექტიდან ფონდმა ადიგენს სამი დაუფინანსა:

•ადიგენი-წრე-პატარა ზანავი-დიდი ზანავი-გომაროს ადგილობრივი მნიშვნელობის გზის რეაბილიტაცია - 902,120 ლარი.
•ვარხანი-ხევაშენი-ნაქურდევის ადგილობრივი მნიშვნელობის გზის რეაბილიტაცია - 559,500 ლარი.
•სოფელ ბოლაჯურში სასმელი წყლის რეაბილიტაცია - 213,335 ლარი.

52, 300 ლარი კი საპროექტო სამუშაოებისთვის იყო გათვალისწინებული.

ადიგენის მუნიციპალიტეტის გამგეობის ეკონომიკისა და ინფრასტრუქტურის სამსახურში განმარტავენ, რომ აღნიშნული პროექტებიდან წელს მხოლოდ ერთი პროექტი დასრულდა.

„მხოლოდ ვარხანი-ხევაშენი-ნაქურდევის გზის რეაბილიტაცია დასრულდა. ბოლაჯურის წყალსადენზე სამუშაოები მთაში იყო შესასრულებელი, მოთოვა და ვერ მოხერხდა სამუშაოების დასრულება. ზუსტად ვერ გეტყვით რა არის დარჩენილი, მაგრამ ეს პროექტი გარდამავალ პროექტებში გადავიდა და მომავალ წელს დასრულდება“, - ამბობს ადიგენის მუნიციპალიტეტის ეკონომიკისა და ინფრასტრუქტურის სამსახურის უფროსი გოდერძი სხირტლაძე.

მისივე თქმით, გარდამავალ პროექტებში გადავიდა ადიგენი-წრე-პატარა ზანავი-დიდი ზანავი-გომაროს ადგილობრივი მნიშვნელობის გზის რეაბილიტაციაც.

„აქაც უამინდობის გამო ვერ დასრულდა სამუშაოები. თოვლი მოვიდა და ასფალტი ვერ დაიგო, მაგრამ მოსამზადებელი სამუშაოები დასრულებულია, მხოლოდ ასფალტის საფარის დაგებაა დარჩენილი“, - გვიხსნის გოდერძი სხირტლაძე.

[SKnews.ge]