ასპინძის მუნიციპალიტეტში მთავარ პრიორიტეტად ისევ გზა დარჩა

რეგიონული განვითარების სამთავრობო კომისიამ ასპინძის მუნიციპალიტეტი პირველ ეტაპზე 1,385,,350 ლარით დააფინანსა, რომლის ფარგლებშიც სოფელ სარო-ხიზაბავრის მისასვლელი გზა მოასფალტდება. პროექტის ფარგლებში რეაბილიტაცია ჩაუტარდება სოფელ დამალაში მისასვლელ გზასაც.

ისევე როგორც სხვა მუნიციპალიტეტებში, პროექტები ასპინძაშიც ადგილობრივმა ხელისუფლებამ შეარჩია.

გზის რეაბილიტაცია იყო პრიორიტეტი ასპინძაში გასულ, 2013 წელსაც. აღნიშნული ფონდიდან გასულ წელს ასპინძის მუნიციპალიტეტში ოთხი პროექტი დაფინანსდა და ოთხივე პროექტი გზებს შეეხებოდა. 2013 წელს ასპინძაში მხოლოდ ორი პროექტი დაასრულეს, ორი კი გარდამავალ პროექტებში გადავიდა.

შეგახსენებთ, საქართველოს რეგიონული განვითარების და ინფრასტრუქტურის სამინისტრომ ინფრასტრუქტურული პროექტებისთვის პირველ ეტაპზე 135 მილიონი ლარი გამოყო, აქედან სამცხე-ჯავახეთში 11,570,015 ლარის ღირებულების 25 პროექტი დამტკიცდა. მათ შორის 18 პროექტი გზებისა და ხიდების რეაბილიტაციას, 2 პროექტი წყლის სისტემის მოწესრიგებას, 5 პროექტი კი ეზოებისა და სხვა ინფრასტრუქტურის მოწერიგებას გულისხმობს. მუნიციპალიტეტები საპროექტო სამუშაოებს უახლოეს პერიოდში დაიწყებენ.

[sknews.ge]