ახალციხის თვითმმართველობის საკონკურსო კომისიამ განცხადებების შესწავლა დაიწყო

ახალციხის მუნიციპალიტეტის თვითმმართველობაში შექმნილი საკონკურსო კომისიის წევრები კონკურსში მონაწილეობის მსურველთა განცხადებებს არჩევენ. ამ წუთებში კომისიის პირველი სხდომა მიმდინარეობს, რომელსაც 9 წევრიდან 7 ესწრება. ახალციხის მუნიციაპლიტეტის საკრებულოს თავმჯდომარე ოლეგ სანდროშვილი, რომელიც ამავე დროს საკონკურსო კომისიის თავმჯდომარეცაა, ამბობს, რომ განცხადება, რომელიც თვითმმართველობის მიერ მოთხოვნილ საკვალიფიკაციო პირობებს არ აკმაყოფილებს, კონკურსიდან ავტომატურად მოიხსნება.

„აქამდე მიმდინარეობდა ვაკანსიების მიხედვით განცხადებების დახარისხება, რათა კომისიის წევრებისთვის სამუშაო მასალა მოგვემზადებინა. დღეს ფაქტობრივად ამ განცხადებების გაცხრილვა მოხდება, რადგან ზოგიერთი მათგანი კონკურსის პირობებს არ აკმაყოფილებს. ჩვენ თავიდანვე მითითებული გვქონდა, რომ ნებისმიერ პიროვნებას მხოლოდ ერთ ვაკანსიაზე უნდა შეეტანა განაცხადი, აქედან გამომდინარე, ვისაც ერთზე მეტ ვაკანსიაზე ჰქონდა განცხადება შემოტანილი, კონკურსიდან მოიხსნება. გარდა ამისა, არ განვიხილავთ იმ განცხადებას, რომელიც საკვალიფიკაციო მოთხოვნებს არ აკმაყოფილებს“, - განმარტავს ოლეგ სანდროშვილი.

მისივე თქმით, კონკურსის მონაწილეებთან გასაუბრებები მაშინ დაიწყება, როცა აღნიშნული განცხადებები გადაირჩევა.

„ჩვენ ვფიქრობთ, რომ პირველ რიგში სამსახურის ხელმძღვანელების ვაკანსიაზე შემოტანილი განცხადებები განვიხილოთ და ეტაპობრივად გადავიდეთ სხვა სპეციალისტებზე. გვინდა, რომ 31 დეკემბრამდე სამსახურის უფროსები და რწმუნებულები მაინც შევარჩიოთ, რომ პირველი იანვრიდან ერთი თანამშრომელი მაინც იყოს სამსახურში. არ არის გამორიცხული, რომ გასაუბრებები მომავალი წლისთვისაც გადავიდეს“, - ამბობს ოლეგ სანდროშვილი.

შეგახსენებთ, რომ ახალციხის ადგილობრივ თვითმმართველობაში საჯარო მოხელეთა შესარჩევი კონკურსისთვის განცხადებების მიღება 20 დეკემბერს დასრულდა.



[თამარ თოთაძე, ახალციხე]