რა კრიტერიუმებით შეარჩიეს კადრები ახალციხის თვითმმართველობაში

„ეს მარტო ჩემი პრეროგატივა არ არის. პირველ ეტაპზე კი გავიარეთ და ჩამოვყლიბდით, მაგრამ სანამ საბოლოოდ არ დავდებთ ოქმს, მათი ვინაობის გამხელისგან თავს შევიკავებ. შერჩეულია სამსახურის ხელმძღვანელების, სპეციალიტებისა და რწმუნებულების ნაწილი“, - ამბობს საკონკურსო კომისიის თავმჯდომარე ოლეგ სანდროშვილი.

საკონკურსო კომისიამ გასაუბრება 29-30 დეკემბერს ჩაატარა. გასაუბრებაზე 238 კონკურსანტიდან-207 გამოცხადდა. კომისიის წევრებმა კონკურსანტები ხუთი კრიტერიუმით შეაფასეს: განათლება შესაბამის სპეციალობასთან, პრაქტიკული გამოცდილება შესაბამის სფეროში, ცოდნა, კომუნიკაბელურობა და მოტივაცია.

საკონკურსო კომისიაში ამბობენ, რომ გასაუბრებაზე ბევრი სუსტი კადრი იყო. ნაწილს კომუნიკაცია უჭირდა, ნაწილს განათლება სხვა ჰქონდა, განაცხადი კი არაშესაბამის პოზიციაზე ჰქონდა შეტანილი. სანდროშვილის თქმით, ასეთ კადრებს შესაძლოა დაუკავშირდნენ: „შეიძლება მოვიწვიოთ, ან დავასაქმოთ კონკრეტული იმ კუთხით, რაშიც აქვს განათლება. განსაკუთრებით ეს შეეხება სამშენებულო დარგის სპეციალისტებს, რომლის ნაკლებობასაც განვიცდით“.

მისივე თქმით, შესაძლოა რომელიმე პოსტზე კონკურსი თავიდან გამოცხადდეს: „შეიძლება რამდენიმე განცხადებაც იყოს შემოტანილი, მაგრამ მაინც პოსტი დარჩეს ღია. კომისიას სრული უფლება აქვს და არავინ არ გვავალდებულებს, რომ აირჩეს იქიდან, ანუ არაშესაფერისი კადრიდან. თუ არ არის მისაღები, დარჩება ვაკანსია თავისუფალი და გამოცხადდება დამატებით“.

შეგახსენებთ, ახალციხის ადგილობრივ თვითმმართველობაში საჯარო მოხელეთა შესარჩევ კონკურსისზე განცხადებების მიღება 20 დეკემბერს დასრულდა. 71 ვაკანსიაზე 547 განაცხადი შევიდა. საკონკურსო კომისიამ ორი ეტაპი, განცხადებების გადარჩევა და გასაუბრება დაასრულა. თუმცა, შედეგები ჯერ ცნობილი არ არის. როგორც თვითმმართველობაში აცხადებენ, საბოლოო შედეგი ცნობილი უახლოეს დღეებში გახდება.

[თინათინ ზაზაძე, ახალციხე]