ახალციხის თვითმმართველობამ 225 მოქალაქეს საახალწლო საჩუქარი გადასცა

ახალციხის მუნიციპალიტეტისგან 225 მოქალაქეს ერთი ტომარა ფქვილი, ერთი ტომარა შაქარი, ხუთი ლიტრი ზეთი და რამდენიმე კილოგრამი ტკბილეული გადაეცა. პროდუქტის შესაძენად ადგილობრივი ბიუჯეტიდან 18 000 ლარი გამოიყო. მოქალაქეებს საჩუქრები მუნიციპალიტეტის პირველმა პირებმა გადასცეს.

„ჩვენ გამოვხატეთ კეთილი ნება იმ მოსახლეობის მიმართ, რომელთაც საახალწლო პროდუქტის შეძენის საშუალება არ აქვთ“, - ამბობს ახალციხის მუნიციპალიტეტის საკრებულოს თავმჯდომარე ოლეგ სანდროშვილი.

გამგებლის მოვალეობის შემსრულებლის ბესიკ ბლიაძის თქმით, მუნიციპალიტეტში მსგავსი აქცია ყოველწლიურად ეწყობა, თუმცა ასეთი მასშტაბით წელს პირველად ჩატარდა.

„ეს აქცია გასულ წელს იყო მხოლოდ დევნილებზე, მაგრამ წელს ჩვენ შევძელით და დავამატეთ ის ადამიანებიც, ვინც უფასო სასადილოში იკვებება“, - ამბობს ბესიკ ბლიაძე.

საჩუქრები უმწეოთა სასადილოში იყო, საიდანაც მოქალაქეებმა თავად წაიღეს.

„ძალიან კმაყოფილები ვართ, რომ საახალწლოდ დაგვეხმარენ და ყურადღებას გვაქცევენ“, - ამბობს უფასო სასადილოს ბენეფიციარი ვარსიკ ბელობაევა.

[თამარ თოთაძე, ახალციხე]