ახალციხის პირველი სკოლა წელს ისევ შეშით თბება

2006 წელს, ახალციხის ყველა საჯარო სკოლაში, განათლების სამინისტროს დახმარებით, ცენტრალური გათბობის სისტემა დამონტჟდა.
ერთი წლის შემდეგ, რამდენიმე სკოლაში გათბობის სისტემას პრობლემები შეექმნა, ნაწილმა ხარვეზი აღმოფხვრა, ნაწილმა კი ცენტრალური გათბობის შეკეთება ვერ შეძლო და საკლასო ოთახებში შეშის ღუმელები დააბრუნა.

ახალციხის სკოლა ერთ-ერთია იმ სკოლებს შორის, სადაც ცენტრალურმა გათბობამ მხოლოდ ერთ წელიწადს გაძლო. იმის გამო, რომ სისტემაში ყინვის საწინაღმდეგო სითხე (ანტიფრიზი) არ ესხა, 2007 წლის ძლიერი ყინვებისას სისტემა მწყობრიდან გამოვიდა.

„მას მერე რამდენჯერმე ვეცადეთ აღდგენას, მაგრამ ვერაფერი ვუშველეთ. ეს გარკვეულ თანხებთანაც არის დაკავშირებული, რასაც ჩვენი სკოლის ბიუჯეტი ვერ სწვდება“, - ამბობს პირველი სკოლის დირექტორი მაკა ჯანაშვილი.

ჯანაშვილი გვიხსნის, რომ განათლების სამინიტროს წერილი რამდენჯერმე გაუგზავნეს, თუმცა უშედეგოდ: „სამინისტროსიც მესმის, არის სკოლები, რომლებიც ჩვენზე უარეს მდგომარეობაში არიან, მათ უფრო უნდათ დახმარება. თან, ჩვენი დიდი სკოლაა და შენობის მთლიანად გათბობა დიდ თანხებთან არის დაკავშირებული. მართალია დისკომფორტია შეშის ღუმელით გათბობა, მაგრამ, სამაგიეროდ, ყველა ბავშვი თბილადაა“.

ჯანაშვილის თქმით, მომავალი წლის გაზაფხულიდან სკოლას სრული რეაბილიტაცია ჩაუტარდება და გათბობის ახალი სისტემა დამონტაჟდება: „წელს ჩვენი სკოლა განათლების სამინისტრომ მილენიუმის პროგრამაში ჩასვა, რომელიც სკოლის სრულ რეაბილიტაციას ითვალისწინებს“.

მომავალ წლამდე, კი სკოლას გამოსაზამთრებლად საჭირო შეშის მარაგი შეძენილი აქვს.

[SKnews.ge]