მაისის ბოლოს ტბაზე გასართობი კომპლექსი გაიხსნება

ხელოვნური ტბის აღდგენა-რეაბილიტაცია და გასართობი კომპლექსის მშენებლობა მიმდინარე წლის მაისის ბოლოს დასრულდება. პროექტის განხორციელებისთვის ორ მილიონამდე ლარია გათვალისწინებული

ახალციხე-ახალქალაქის გზატკეცილზე მდებარე ხელოვნური ტბის აღდგენა-რეაბილიტაცია გასული წლის აგვისტოში დაიწყო. დამშრალი ტბის გარშემო განათება უკვე დამონტაჟებულია, გაკეთებულია საფეხმავლო ბილიკი და ველო-ტრასაც.

ტბის ერთ მხარეს ამფითეატრი კეთდება, რომელიც დაახლოებით 400 კაცს დაიტევს, მათ შორის, 150 შენობის თავზე, ქოლგების ქვეშ მოთავსდება. შენობის პირდაპირ, ტბაში შეჭრილი სცენა უკვე მოეწყო. აქვეა დამონტაჟებული სპეციალური მოწყობილობები შადრევნისთვის, რომელიც სცენის გვერდზე, ტბაში იქნება.

ამ ეტაპზე ახალციხე-ახალქალაქის გზატკეცილიდან ტბამდე მისასვლელი 550 მეტრიანი სამანქანო გზის მშენებლობა მიმდინარეობს, სადაც ტროტუარები და განათება გაკეთდება. აღნიშნული გზის მშენებლობისთვის დამატებით 364 ათასი ლარი გამოიყო და მისი მშენებლობაც მაისის ბოლოსთვის უნდა დასრულდეს.

- “ეს თანხა რეგიონში განსახორციელებელი პროექტების ფონდიდან გამოიყო, მაგრამ იქ მითითებულია, რომ თანხა განკუთვნილია გზების რეაბილიტაციისთვის და არა ტბის პროექტისთვის. თუმცა, საერთო ჯამში ეს გზა ტბის კომპლექსს მოემსახურება”, - განმარტავს ახალციხის მინიციპალიტეტის გამგებლის მოადგილე გიორგი გიქოშვილი და ამატებს, რომ ხელოვნური ტბის ტერიტორიაზე ახალი სკამები და ნაგვის ურნები დაიდგმება.

სცენის უკანა მხარეს, უკვე სრულდება კაფე-ბარის მშენებლობაც.

- “ორი კვირაა რაც ამ მშენებლობაზე ვმუშაობ და მხოლოდ კაფის გარე ფასადის შეღებვა მევალება. ალბათ ორ კვირაში გარედან დავასრულებთ და მხოლოდ შენობის შიგნიდან დარჩება რემონტი გასაკეთებელი”, - ამბობს კაფის მშენებლობაზე დასაქმებული ვარაზ შუშანიანი.

ხელოვნური ტბის აღდგენა-რეაბილიტაციის პირველადი სამუშაოები უკვე დასრულებულია. მდინარე ფოცხოვიდან ტბამდე წყალი მიყვანილია, ასევე მოწყობილია წყლის დამცლელი და გადამღვრელი სისტემაც.

- “წყალი საცდელად უკვე გაუშვეს, გადამღვრელიც და დამცლელიც შემოწმდა, ყველაფერი გამართულად მუშაობს. ჯერ ბოლომდე არ დასრულებულა შადრევნის შეერთებები და კაფეების მშენებლობა. როგორც კი ეს ყველაფერი დასრულდება, ტბაში წყალს გაუშვებენ, - ამბობს გიქოშვილი და ამატებს, რომ უსაფრთხოების ნორმები დაცულია და მდინარის ადიდების შემთხვევაში კომპლექსს საფრთხე არ ემუქრება, - მდინარის გვერდით ამაღლება ისეა გაკეთებული, რომ წყალი ტბამდე ვერ მივა. თუმცა, ნაპირსამაგრი სამუშაოებისთვის თანხა დამატებით მოვითხოვეთ. თუ საჭირო თანხა გამოინახა, პირველი საჯარო სკოლიდან ტბამდე ნაპირსამაგრი სამუშაოები ჩატარდება”.

ამჟამად ტბის ერთ მხარეს საზოგადოებრივ საპირფარეშოებს აშენებენ. სამუშაოებს კომპანია “ლიკანი 2000” ასრულებს.

- “დაგეგმილია სამ განყოფილებიანი საპირფარეშოს გაკეთება, რომელიც განკუთვნილი იქნება მამაკაცებისთვის, ქალებისთვის და შეზღუდული შესაძლებლობების მქონე ადამიანებისთვის. პროექტში გათვალისწინებულია ინვალიდის ეტლით გადასაადგილებლად ყველა საჭირო შესასვლელის გაკეთება”, - განმარტავს კომპანია “ლიკანი 2000”-ის ტბის რეაბილიტაციის პროექტის ჯგუფის ხელმძღვანელი გია რაზმაძე.

გარდა 1’776’600 ლარისა, რაც პროექტის განხორციელებისთვის ცენტრალური ბიუჯეტიდანაა გამოყოფილი, ხელოვნური ტბის საბოლოო აღდგენა-რეაბილიტაციისთვის დამატებით 253 ათასი ლარი გამოიყო. გიორგი გიქოშვილის თქმით, პროექტის საბოლოო დასრულებას ტენდერში გამარჯვებული კომპანია “სამშენებლო ტრესტი #3” უზრუნველყოფს.

[თამარ თოთაძე, ახალციხე]