მერია ახალციხის ტბის რეაბილიტაციას იწყებს

ქალაქ ახალციხის მერია ახალციხის ხელოვნურ ტბაზე აღდგენით სამუშაოებს იწყებს. როგორც მერიაში განმარტავენ ტბის განვითარებაზე შპს „ახალციხის ტბა“ იზრუნებს. ტბის სრული რეაბილიტაციისთვის კი 100 ათასი ლარი დაიხარჯება.

„შეიქმნება შპს რომელსაც ერქმევა „ახალციხის ტბა“ და რომელიც იზრუნებს ყველაფერზე, რაც ახალციხის ტბასთან იქნება კავშირში. ამაზე მუშაობა უკვე დაწყებულია. შპს იქნება 100 პროცენტით მერიის საკუთრება“, – ამბობს ქალაქ ახალციხის მერი გიორგი კოპაძე და ამატებს, რომ „ახალციხის ტბა“ ქალაქის ბიუჯეტის შემოსავალს გაზრდის.

მისივე თქმით, პირველ რიგში ახალციხის ტბაზე სანაპიროსა და ტბაზე შემავალი წყლის სათავე ნაგებობის გაკეთება იგეგმება: „სანაპიროს მოსაწყობად საჩხერიდან 1000 კუბამეტრი სილა უნდა ჩამოვიტანოთ, რომლის ხარჯთაღრიცხვის გაკეთებაზე უკვე ვმუშაობთ. რაც შეეხება წყლის სათვე ნაგებობას, რომლის საშუალებითაც შედის წყალი ტბაში, თავის დროზე არასწორედ გაკეთდა, როგორც კი წყლის დონე მატულობს პრობლემები იქმნება, ამიტომ, როგორც კი ცოტა დათბება, ამ პრობლემას გადავჭრით“.

ქალაქის მერია ტბაზე ოთხი ნავის და წყლის ველოსიპედების გაშვებასაც გეგმავს. გამოიყოფა ადგილი სადაც უცხოელ ტურისტებს კარვების დადგმა და ღამის გათენება შეეძლებათ. ამოქმედდება ის საზოგადოებრივი საპირფარეშო, რომელიც ტბის ტერიტორიაზე ჯერ კიდევ გასულ წელს გაკეთდა. იგეგმება ტრენაჟორების დადგმაც.

„მოგეხსენებათ ტბის გახსნიდან მალევე დაიხურა ტბაზე არსებული ერთ – ერთი კაფე, ჩვენ ვესაუბრეთ მეპატრონეს და გეგმავს, რომ კაფე ისევ აამუშაოს. რაც შეეხება სასტუმროს, რომლის მშენებლობაც შეჩერებულია, მფლობელებს ვერ დავუკავშირდით, ამიტომ არ ვიცით რას აპირებენ. როგორც ვიცი, სასტუმროს სარდაფი წყლით არის სავსე და სავარაუდოდ მშენებლობაც ამის გამო შეჩერდა“, – ამბობს კოპაძე და ამატებს, რომ ამ ეტაპზე მერია ტბაში არსებული შადრევნის აღდგენას ვერ ახერხებს, „ფანტანს ძრავა აქვს დაზიანებული, გარდა ამისა, როგორც ვიცი მოქალაქეებმა ნათურებიც დააზიანეს. ფანტანის შესაკეთებლად დაახლოებიოთ 80 ათასი ლარია საჭირო, ამ ეტაპზე კი ამდენი თანხა არ გვაქვს“.

შეგახსენებთ, რეაბილიტირებული ხელოვნური ტბა 2012 წლის მაისის ბოლოს გაიხსნა. გახსნიდან ორ წელიწადში ორ მილიონ ლარად მოწყობილ ხელოვნური ტბის გასართობ კომპლექსში, ტბის ნაწილი დაშრა, ნაწილი დაჭაობდა, წყლის მილები დასკდა, შადრევნის ძრავა კი დაზიანდა. ხელისუფლების შეცვლიდან დღემდე კი ახალციხის ტბაზე არაფერი გაკეთებულა.

[მანანა სარაშვილი, ახალციხე]