ფეხბურთის მატჩები დიდ ეკრანზე

ტბაზე არსებულ ამფითეატრს ფუნქციონირება ჯერ არ დაუწყია, თუმცა, ხვალიდან აქ ფეხბურთის გულშემატკივარს ელოდებიან. დასწრება თავისუფალია, ევროპის ჩემპიონატისთვის თვალის დევნება ნებისმიერ მსურველს შეუძლია.

”ეკრანი დაკიდეს, გამაძლიერებლები და ანტენები დაამონტაჟეს. ყველაფერი შეამოწმეს და კარგად მუშაობს, - გვიხსნის ხელოვნური ტბის სამშენებლო სამუშაოებზე დასაქმებული ვასილ ჭანკვეტაძე.

ხელოვნურ ტბაზე ჯერ არც კაფეები გახსნილა. მშენებლობაზე დასაქმებული ადამიანების თქმით, სავარაუდოდ, კაფეებიც ხვალიდან ამუშავდება.

ახალციხე - ახალქალაქის გზატკეცილზე მდებარე ხელოვნური ტბის რეაბილიტაცია გასული წლის სექტემბერში დაიწყო და ჯერ არ დასრულებულა.

ამ დრომდე ტბაში არც წყალია შესული. ტბის გავსება სავარაუდოდ ათი ივნისიდან დაიწყება და დაახლოებით ერთი კვირა დასჭირდება. ხელოვნური ტბის რეაბილიტაციისთვის ორ მილიონამდე ლარია გათვალისწინებული.

[თამარ თოთაძე, ახალციხე]