„ფარავან ჰესის“ მშენებლობის გამო დაზარალებული თბილისის საქალაქო სასამართლოს მიმართავს

ციხელაშვილების მრავალსულიან ოჯახს, მანადე სანამ ნაკვეთს „ურბან ენერჯი“ ჰესის სამშენებლო სამუშაოებისთვის გამოიყენებდა, აქ ხეხილის ბაღი და სახნავ-სათესი ფართობი ჰქონდა. ოჯახი თავს, სწორედ ამ კნაკვეთზე მოყვანილი მოსავლით ირჩენდა.

„წელიწადზე მეტი გავიდა, ათასი დოკუმენტი შევაგროვე, სად აღარ მივედი, სასამართლოშიც ვიჩივლე, მაგრამ ამ საქმის ბოლომდე მისვლას საშველი არ დაადგა“, - ამბობს ალეკო ციხელაშვილი, რომელსაც ”ფარავან ჰესზე” მუშაობისას საწარმოო ტრამვა აქვს მიღებული, ხელჯოხების გარეშე გადაადგილება არ შეუძლია და შესაბამისად შრომისუუნაროა.

ციხელაშვილის ადმინისტრაციული სარჩელი, ნასყიდობის ხელშეკრულების გაუქმებისა და 13 მეასედი მიწის ნაკვეთის მასზე რეგისტრირების მოთხოვნასთან დაკავშირებით, ახალციხის რაიონულმა სასამართლომ არ დააკმაყოფილა. ამიტომ ახლა ციხელაშვილი ახალი ადმინისტრაციული სარჩელის შესატანად ემზადება. ამჯერად ადმინისტრაციული დავა თბილისის საქალაქო სასამართლოში გაგრძელდება.

„ახლა ექსპერტიზას ველოდებით, რომელმაც უნდა დაადგინოს ის, რომ ციხელაშვილის მიწის ნაკვეთი „ურბან ენერჯიმ“ გადაფარა, ამის შემდეგ შევიტანთ სარჩელს თბილისისი საქალაქო სასამართლოში და ფულად კომპენსაციას მოვითხოვთ“, - გვიხსნის ალეკო ციხელაშვილის ადვოკატი თამაზ კვახაძე.

მისი განმარტებით, იმისთვის რომ ექსპერტიზა დაიწყოს, ჯერ ციხელაშვილმა ასპინძის მუნიციპალიტეტის გამგეობიდან მიწის განაწილების სია უნდა გამოითხოვოს.

შეგახსენებთ, რომ ციხელაშვილებს აღნიშნული მიწის ნაკვეთი საკუთრებაში 1944 წლიდან აქვს. მათ თან აქვთ, მიწის საკუთრებაში არსებობის ყველა დამადასტურებელი დოკუმენტიც, თუმცა მიუხედავად ამის გასული წლის 18 იანვარს, როცა ციხელაშვილებმა აღნიშნული ნაკვეთის საკადასტრო აზომვითი ნახაზი გააკეთეს და ფართობის საჯარო რეესტრში დარეგისტრირება მოინდომეს, (რადგან კანონში ამ მხრივ ცვლილებები შევიდა), ასპინძის საჯარო რეესტრში განუცხადეს, რომ მიწა მას არ ეკუთვნოდა. როგორც მოგვიანებით ციხელაშვილმა ეკონომიკის სამინისტროში გაარკვია, სამინსიტრომ 2007 წლის 11 დეეკმბერს აღნიშნული ბაღი შპს ”საქართველო ურბან ენერჯის” მიჰყიდა, რომლის დამფუძნებლებიც თურქები არიან.

[თამუნა უჩიძე, ახალციხე ]