‘მუშაობა შევწყვიტეთ, ყველა იზოლაციაშია’ – ახალციხის სასწრაფოს თანამშრომელი

დღეს, 20 ოქტომბერს ახალციხის სასწრაფო სამედიცინო დახმარების ცენტრში „სამხრეთის კარიბჭეს“ რამდენიმე თანამშრომელი დახვდა. მათი თქმით, ექიმების და მძღოლების ნაწილი კოვიდსასტუმროებში, ნაწილი კი თვითოზოლაციაშია გადასული, ამიტომ მუნიციპალიტეტს დროებით ადიგენის სასწრაფო დახმარების ცენტრი ემსახურება.

ახალციხის სასწრაფოს დაკეტვის შესახებ, ინფორმაცია კატეგორიულად უარყვეს სასწრაფო სამედიცინო დახმარების ცენტრის საზოგადოებასთან ურთიერთობის სამსახურში, თუმცა დაგვპირდნენ რომ ინფორმაციას გადაამოწმებენ.

სამცხე–ჯავახეთის სახელმწიფო რწმუნებულის აპარატის უფროსი, გიორგი მიქელაძე აცხადებს, რეგიონში ბოლო 24 საათში მედპერსონალის დაინფიცირების 22 ახალი შემთხვევაა გამოვლენილი.

მედპერსონალის დაინფიცირების გამო, ახალქალაქს, დროებით ნინოწმინდის სასწრაფო სამედიცინო დახმარების ჯგუფი ემსახურება.



[რობი ზარიძე]