‘ტაო’ პირველი ლიგის პირველი მატჩისთვის ემზადება ®

პირველი ლიგის პირველმატჩში, "ტაოელები" წყალტუბოს გუნდ “დინოზავრს“ შეერკინებიან. შეხვედრა 4 ოქტომბერს, 13:00 საათზე ქუთაისში, „აია არენას“ სტადიონზე გაიმართება. 5 თვიანი პაუზის შემდეგ, გუნდისთვის პირველი მატჩია, რომლისთვისაც განსაკუთრებულად ემზადებიან.

კარანტინის პერიოდში „ტაოს“ მორაგბეები სახლის პირობებში ვარჯიშობდნენ. სოციალური ქსელში, ჯგუფი ჰქონდათ შექმნილი და იქ უზიარებდნენ ერთმანეთს ვარჯიშებს. ეპიდემიოლოგებისა და საქართველოს მთავრობის მიერ დადგენილი რეგულაციების შესაბამისად, ივლისის მეორე ნახევრიდან ახალციხის ცენტრალურ სტადიონზე ვარჯიშებიც განაახლეს.

„ამ წუთას შეკრებაზე ვართ და ინტენსიურ ვარჯიშებს გადიან ბიჭები. ხვალ კი ყველა წავალთ ქუთაისში“, - ამბობს კლუბის პრეზიდენტი, ირაკლი გვენეტაძე.

ბაზაზე ინტენსიური ვარჯიშების გარდა, „ტაომ“ გუნდის შემადგენლობაც გადაახალისა. რამდენიმე მოთამაშე მათივე კლუბის „ა“ ლიგიდან დაიმატა. დაიბრუნა თავისი ძველი მორაგბე ფოცხვერაშვილი, რომელიც ბოლო წლებში „არმიაში“ თამაშობდა. რამდენიმე მოთამაშე „ყოჩებიდან“ და „დინამოდანაც“ დაიმატა.

პანდემიის გამო, პირველი ლიგის 2019–20 წლის სეზონი ვერ დასრულდა. ჩემპიონატის შეწყვეტის მომენტში, პირველი ლიგის პირველ–მეორე ადგილოსანმა გუნდებმა დიდ ათში გადაინაცვლეს. პირველ ლიგაში კი, შესაბამისად ოთხმა გუნდმა გადაინაცვლა რეგიონული ლიგიდან. მოცემული შედეგების მიხედვით, კი „ტაომ“ მეხუთე ადგილიდან მესამე ადგილზე გადაინაცვლა.

2020–21 წლის სეზონზე, „ტაოს“ მიზანია მესამე ადგილი შეინარჩუნოს. მომდევნო სეზონზე კი პირველი ან მეორე ადგილის დასაკავებლად იბრძოლოს და „დიდ ათშიც“ გადაინაცვლოს.

„ბურთი მრგვალი არ არის და რაგბიში შემთხვევითობა ძალიან იშვიათია. ობიექტურად თუ შევაფასებთ სიტუაციას, 20–21 წლის ჩემპიონატზე ვგეგმავთ მესამე ადგილის შენარჩუნებას. ეს კი ჩვენთვის ტრამპლინი იქნება, 2021–22 წლის სეზონისთვის, რომ ვიფიქროთ დიდ ათში გადასვლაზე. ჩვენ არ გვინდა, დიდ ათში მოუმზადებლები მოვხვდეთ. ჩვენ ხომ ჩვენი რესურსით(იგულისხმება ადგილობრივი მორაგბეები) ვიბრძვით, ამიტომ გვინდა, რომ ჩვენი ბიჭები მოვამზადოთ და ასე მოვხვდეთ დიდ ათში“, განაცხადა კლუბის პრეზიდენტმა ირაკლი გვენეტაძემ.

2020–21 წლის პირველი ლიგის ჩემპიონატი4 ოქტომბერს იწყება და 2021 წლის გაზაფხულზე დასრულდება.