'ტაო' ფინალურ მატჩს 'დინამოსთან' გამართავს [R]

როგორც კლუბის პრეზიდენტი, ირაკლი გვენეტაძე ამბობს, ეს მატჩი განსაკუთრებით მნიშვნელოვანია "ტაოს" მორაგბეებისთვის, რადგან "დინამოსთან" პრემიალური ქულით მოგების შემთხვევაში, "ტაო" ოზურგეთის "არწივებს" წინ გაუსწრებს და სატურნირო ცხრილში მეოთხე ადგილზე გადაინაცვლებს. ეს კი პირველ ლიგაში, პირველად მოასპარეზე გუნდისთვის დადებითი შედეგია.

"ბიჭები ამ მატჩისთვის თავდადებით ემზადებიან, მაგრამ რაგბის თამაშისთვის უმნიშვნელოვანესია "მეთექვსმეტე მოთამაშედ წოდებული", გულშემატკივრის ფაქტორი. იმედია, 30 მარტს, 16:00 საათზე, საკუთარი რეგიონის მორაგბეთა საგულშემატკივროდ ბევრი ქომაგი შეიკრიბება", - აღნიშნავს ირაკლი გვენეტაძე.

შეგახსენებთ, რომ სარაგბო კლუბი "ტაო" 2016 წლის ივნისში დაარსდა და 2018 წლის მაისიდან, კლუბის ძირითადმა გუნდმა პირველ ლიგაში თამაშის უფლება მოიპოვა.

2018–2019 წლის პირველი ლიგის სეზონი დასასრულს უახლოვდება. 30 მარტის შეხვედრის შედეგი განსაზღვრავს სატურნირო ცხრილში "ტაოს" რიგითობას.