‘სკოლებში წყლის არსებობა ადგილობრივი ხელისუფლების მოვალეობაა’ – გამყრელიძე

„სამხრეთის კარიბჭეს“ კითხვაზე, როგორ უნდა დაიცვან დადგენილი რეგულაციები, სამცხე–ჯავახეთში არსებულმა იმ სკოლებმა, რომლებსაც წყალი არც შენობაში აქვთ და არც ეზოში დგას მოქმედი ონკანი, ამირან გამყრელიძემ უპასუხა, რომ მათთვის ამ პრობლემის მოგვარება ადგილობრივი თვითმმართველობის მოვალეობაა:

„სკოლებში შეიძლება არ იყოს ცენტრალური გაყვანილობა, მაგრამ წყლის მიტანის, საპნის არსებობის, ხელის დაბანის შესაძლებლობები უნდა იყოს. ეს არის სოფლის რწმუნებულის, რაიონის გამგებლის მოვალეობა“, – განაცხადა გამყრელიძემ ბათუმში, ჟურნალისტებთან გამართულ შეხვედრაზე.

მისივე თქმით, რიგ სკოლებში სანიტარია–ჰიგიენის თვალსაზრისით პრობლემები კვლავ რჩება, მაგრამ მდგომარეობა უკეთესია, ვიდრე იყო.

„მე მესმის, რომ სანიტარია შეიძლება ყველა სკოლაში არ იყოს დაცული, მაგრამ ყველფერი შედარებითია. მე როგორც ვიცი, ბევრად უკეთესად არის დღეს სასკოლო სივრცეები მომზადებული, ვიდრე ეს იყო 5–10 წლის წინ“.

როგორც გამყრელიძე აცხადებს, სკოლებისა და უნივერსიტეტების შენობებში სწავლა განახლდება. საგანმანათლებლო დაწესებულებებში დაახლოებით 600 000 ბავშვსა და 120 000 სტუდენტს ელოდებიან.

[sknews.ge]