‘შემთხვევების რაოდენობა იქნება და ამას უნდა მივეჩვიოთ’ - გამყრელიძე

როგორც ბრიფინგზე გამყრელიძემ განმარტა, შემთხვევათა ზრდა კვლავ მოსალოდნელია, თუმცა მასშტაბური შეზღუდვები არ იგეგმება. „ამ ტიპის შემთხვევების რაოდენობა იქნება და ამას უნდა მივეჩვიოთ. კორონავირუსული ინფექცია არსად გაქრება კიდევ დაახლოებით ერთი წელიწადი. მაგრამ ის, რომ დიდი შეზღუდვები იყოს, რომელიც ეკონომიკას გააჩერებს, ეს უკვე არსად არ არის რეკომენდებული და არ ხდება. გარდა ამ წერტილოვანი დარტყმებისა“.

მისივე თქმით, ამ ეტაპზე ყველაზე მნიშვნელოვანია, რომ აჭარაში მდგომარეობა დასტაბილიზირდეს.

შეზღუდვებს რომ მასშტაბური სახე არ ექნება, ამის შესახებ მთავრობის ადმინისტრაციის ხელმძღვანელმა ნათია მეზვრიშვილმაც განაცხადა: „დღეს როდესაც შემოგვაქვს ესა თუ ის შეზღუდვა, ამას ვახორციელებთ წერტილოვნად, ლოკალურად. ვაცხადებთ შეზღუდვას იქ, სადაც რეალურად ვირუსის გავრცელება ხდება უფრო მეტად“.

მისივე თქმთ, ხვალიდან 15 სექტემბრიდან ძალაში შევა კარანტინის ვადის შემცირებასთან დაკავშირებული რეგულაცია.

[თაკო ფეიქრიშვილი]