ახალციხეში სასწრაფო, რომელსაც მძიმე ავადმყოფი გადაჰყავდა ავარიაში მოყვა [ფოტო/ვიდეო]

ავტოსაგზაო შემთხვევა 15:00 საათზე მოხდა, სასწრაფო სამედიცინო დახმარების მანქანა, რომელსაც მძიმე ავადმყოფი სოფელ საძელიდან კლინიკაში გადაჰყავდა, ჯერ მსუბუქ მანქანას შემდეგ კი ხეს შეეჯახა.

"სირენები მქონდა ჩართული, ზემოდან უეცრად გამომივარდა მანქანა, ვერ დავიმორჩილე საჭე და ხეს შევეჯახე. პაციენტი მეორე სასწრაფომ გადაიყვანა. ექიმია დაშავებული", – ამბობს სასწრაფოს მძღოლი დავით წიქარიშვილი.

ახალციხის რეფერალურ ჰოსპიტალში ორი დაშავებული შეიყვანეს, კლინიკაში აცხადებენ, რომ ორივეს ამ ეტაპზე გამოკვლევები უტარდება.

შემთხვევის ადგილზე მობილიზებულია სახანძრო–სამაშველო სამსახურის და საპატრულო პოლიციის ეკიპაჟები.

შსს-მ გამოძება 276 მუხლის მეორე ნაწილით დაიწყო, რაც ტრანსპორტის მოძრაობის ან უსაფრთხოების ან ექსპლუატაციის წესის დარღვევას გულისხმობს, რამაც ჯანმრთელობის მძიმე ან ნაკლებად მძიმე დაზიანება გამოიწვია.











[თინათინ ზაზაძე, ახალციხე]