საკრებულოში დაშლილი ფრაქციის წევრებმა ახალი შექმნეს – გოგოლაძე მიღმა დარჩა

საკრებულოში შექმნილ ახალ ფრაქციას დეპუტატი სამველ ოვეიანი უხელმძღვანელებს, მისი წევრები კი მიმდინარე წლის მაისში დაშლილი „ქართული–ოცნება მწვანეების“ დეპუტატები, არჩილ უჩიძე და მკრტიჩ გინოსიანი არიან.

თამარ გოგოლაძე, რომელიც „ქართული ოცნება – მწვანეების“ თავმჯდომარე იყო „სამხრეთის კარიბჭესთან“ აცხადებს, რომ ახალი ფრაქციის შექმნით, კიდევ ერთხელ ცხადი გახდა რომ მისი ჩამოშორება უნდოდათ.

„წარმოდგენა არ მქონდა რომ ახალი ფრაქცია იქმნებოდა და ძალიან მოულოდნელი იყო. მაგათ უნდათ ჩემი კრიტიკული დამოკიდებულების გამო, ყველაფერს ჩამომაშორონ. ფაქტი სახეზეა, გარეშე თვალითაც ჩანს ყველაფერი. პიროვნულად ახალი ფრაქციის თავმჯდომარეს პატივს ვცემ, თუმცა ის პირადად არ წყვეტს არაფერს, ვინც წყვეტს ასეთ საკითხებს, ეს არის ქალაქის მერი [ზაზა მელიქიძე]“ – ამბობს თამარ გოგოლაძე.

კითხვას, ნიშნავდა თუ არა თამარ გოგოლაძის ჩამოშორებას, ძველი ფრაქციის დატოვების და ახლის შექმნის ფაქტი, არჩილ უჩიძე ასე პასუხობს.

„არაფერი დაუშავებია ჩემთვის თამარ გოგოლაძეს და არც არავის, ეს იყო უბრალოდ ჩემი გადაწყვეტილება რომ ასე უნდა მომხდარიყო“, – ამბობს უჩიძე.

„ქართული ოცნება – მწვანეების“ დაშლაში ნებისმიერი სახით მონაწილეობას უარყოფს ახალციხის მერი, ზაზა მელიქიძე.

„მე არც ფრაქციის დაშლაში მიმიღია მონაწილეობა და არც შექმნაში. ეს საკითხები არის საკრებულოს გადასასაწყვეტი და ამაზე დეპუტატები თვითონ იღებენ გადაწყვეტილებას“, – განაცხადა ზაზა მელიქიძემ.

ახალი ფრაქციის შექმნის შემდეგ, ცვლილება შევიდა საკრებულოს საშტატო ნუსხაშიც. მაისში დაშლილ ფრაქცია „ქართული ოცნება – მწვანეებს“ მოადგილე არ ჰყავდა. ახალი ფრაქციაში მოადგილე კი არჩილ უჩიძე იქნება. შედეგად საკრებულოს პოლიტიკური თანამდებობის პირთა რაოდენობა ერთით გაიზარდა.

ახალი ფრაქციის შექმნის შესახებ ახალციხის საკრებულოს დღეს, 27 აგვისტოს გამართულ სხდომაზე ეცნობა.

[რობი ზარიძე]