ნინოწმინდაში დაკავებული ახალგაზრდების გათავისუფლების მოთხოვნით ადგილობრივები აქციას მართავენ

პროტესტი ახალქალაქში დღეს, 26 აგვისტოს, სასამართლო პროცესის დასრულების შემდეგ დაიწყო. მოსამართლე არარატ ესოიანმა 23 აგვისტოს დაკავებულ 11 პირს აღკვეთის ღონისძიებად პატიმრობა შეუფარდა. 11–დან სამი თორიას მკვიდრია, რვა კი მომთაბარე მწყემსი.

სოფელ თორიას მოსახლეობა დაკავებული პირების გათავისუფლებას ითხოვენ და აცხადებენ, რომ იქამდე არ დაიშლებიან, ვიდრე მათი მოთხოვნა არ დაკმაყოფილდება.

23 აგვისტოს თორიელებსა და მომთაბარე მწყემსებს შორის სიტყვიერი შელაპარაკება ფიზიკურ დაპირისპირებაში გადაიზარდა. დაშავდა შვიდი ადამიანი, 11 კი სამართალდამცავებმა დააკავეს.

სოფელ თორიაში მცხოვრებ სამ პირს ბრალი სსკ-ს 126–ე მუხლის პირველი პრიმა ნაწილის ბ და გ ქვეპუნქტებით, რაც ჯგუფურ ძალადობას გულისხმობს ორი ან მეტი პირის მიმართ. ისჯება ჯარიმით ან საზოგადოებისათვის სასარგებლო შრომით ვადით ას ოთხმოციდან ორას ორმოც საათამდე ანდა თავისუფლების აღკვეთით ვადით ორ წლამდე, იარაღთან დაკავშირებული უფლებების შეზღუდვით ან უამისოდ.

ხოლო მომთაბარე მწყემსებს უფრო მძიმე მუხლით წარედგინათ, სსკ-ს 225 მუხლის მეორე ნაწილით, რაც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს. ისჯება თავისუფლების აღკვეთით ვადით ოთხიდან ექვს წლამდე.

მომთაბარე მწყემსები ამბობენ, რომ თორიას მოსახლეობამ მათი საძოვრებით სარგებლობის სანაცვლოდ იმაზე მეტი ცხვარი მოითხოვა, რაზეც შეთანხმება ჰქონდათ. თორიელები კი აცხადებენ, რომ მომთაბარე მწყემსების ფარამ ის ტერიტორია გაანადგურა, სადაც ზამთრის სამყოფი თივა უნდა მოეთიბათ.

დაკავებულების გათავისუფლების მოთხოვნით მსგავსი აქცია 24 აგვისტოს ნინოწმინდის პოლიციის შენობასთანაც გაიმართა.

[sknews.ge]