სოფელ თორიას საძოვრებზე ჩხუბი, სადაც შვიდი ადამიანი დაშავდა, 11 კი პოლიციამ დააკავა, 23 აგვისტოს მოხდა.
მომთაბარე მწყემსები ამბობენ, რომ დაპირისპირების დღეს სოფელ თორიას მცხოვრებლებთან მოლაპარაკებებს აწარმოებდნენ. შედეგით უკმაყოფილო ახალგაზრდებმა კი ისინი სცემეს.
„ჩვენ თითქმის ყოველ წელს მოგვყავს ცხვარი ნინოწმინდის საძოვრებზე, ადგილობრივების ტერიტორიაზე თივის აღების შემდეგ შევდივართ, სანაცვლოდ კი 2 ცხვარს ვაძლევთ–ხოლმე. წელს ხუთი, ზოგმა კი მეტი ცხვარი მოითხოვა, ჩვენ უარი ვუთხარით ეს არ ესიამოვნათ და ამიტომ დაიწყეს ჩხუბი. პირველად ერთ–ერთი მწყემსის დის შვილს დაარტყეს, მერე სხვებიც მოეშველნენ, 40 მანქანით იყვნენ მოსული. როგორ წარმოგიდგენიათ, ჩვენ სულ ექვსი ოჯახი ვართ, რამდენი კაცი ვიქნებოდით?! ისინი ძალიან ბევრნი იყვნენ, იმედია მოვრიგდებით და პრობლემა აღარ იქნება“, – ამბობენ „სამხრეთის კარიბჭესთან“ მომთაბარე მწყემსების ოჯახის წევრები.
საპირისპიროს ამტკიცებენ სოფელ თორიას მოსახლეობა, მათი თქმით, მომთაბარე მწყემსების ფარამ საძოვრები ფაქტობრივად გაანადგურა. ჩხუბი კი მხოლოდ მას შემდეგ დაიწყეს, როცა მწყემსებმა, სიტყვიერი შელაპარაკების დროს, მათთან მყოფ არასრულწლოვანს ცხვირში დაარტყეს.
სოფელში ამბობენ რომ მწყემსები ჯოხებითა და არმატურებით იყვნენ შეიარაღებულები, მათ კი თან არაფერი ჰქონდათ.
„რატომ გვიშლით თქვენი საძოვრებით სარგებლობასო და 14 წლის ბიჭს დაარტყეს, ამის მერე დაიწყო ჩხუბი. მერე ამ ბიჭის მამა დააკავეს. ჩვენები მათთან შესახვედრად ცარიელები წავიდნენ, არაფერი იარაღის მსგავსი არ ჰქონდათ, იმათ კიდევ ჯოხები და არმატურები ჰქონდათ“, - ამბობს სოფელ თორიას მკვიდრი ოვანეს ანტონიანი.
ანტონიანის მსგავსად, იგივეს ჰყვებიან მისი თანასოფლელები: „რა უნდათ ჩვენს საძვრებზე? ამ პანდემიის გამო რუსეთში ვერ მივდივართ და ერთადერთი სარჩო ისაა, რომ საქონელს მივხედოთ. ყოველ წელს მიდიან კაცები და თივა ჩამოაქვთ, წელს კი ცხვრებმა გადაჭამეს, თავი რით ვირჩინოთ?!“
ადგილობრივები უარყოფენ იმ ფაქტს, რომ საძოვრების სანაცვლოდ მწყემსებისგან ცხვრები მოითხოვეს.
სოფელ თორიას საძოვრები დასახლებიდან დაახლოებით 40 კილომეტრშია, დაპირისპირებაც სწორედ იქ მოხდა. შემთხვევის შედეგად სამი ადგილობრივი და რვა მწყემსი დააკავეს.
სხვადასხვა დაზიანებებით ნინოწმინდის სამედიცინო დაწესებულებაში შვიდი პირი შეიყვანეს, აქედან რამდენია მწყემსი, ან თორიაც მკვიდრი, ჩვენთვის უცნობია.
კლინიკაში გვითხრეს, რომ შვიდივე მათგანს თავსა და კიდურებზე მსუბუქი დაზიანებები აღენიშნებოდათ, პირველადი სამედიცინო დახმარების გაწევის შემდეგ კი გაწერეს: „თავიდან ხუთი შემოიყვანეს, შემდეგ კი ორი. მათი მდგომარეობა დამაკმაყოფილებელი იყო, როგორც ვიცი შვიდიდან არასრულწლოვანი მხოლოდ ერთია“.
შსს–მ 23 აგვისტოს მომხდარი ჩხუბის შედეგად გამოძიება სისხლის სამართლის კოდექსის ორი, ჯგუფური ძალადობის ორგანიზებისა და ჯგუფური ძალადობის მუხლებით
დაიწყო, დაკავებულია 11 პირი.
დაკავებულების გათავისუფლების მოთხოვნით თორიას მოსახლეობა ნინოწმინდის პოლიციასთან გუშინ, 24 აგვისტოს
შეიკრიბა. სამცხე–ჯავახეთში მომთაბარე მწყემსებთან დაპირისპირების ეს პირველი შემთხვევა არ არის, მიმდინარე წლის
24 ივნისს და
10 ივლისს ახალციხეში 13 სოფლის მოსახლეობამ აქცია
გამართა, ისინი მათი საძოვრებიდან მომთაბარე მწყემსების გაყვანას
ითხოვდნენ.
[მარიამ ბარძიმაძე]