ჭელაში მცხოვრები ქრისტიანები მინარეთზე საუბარს ერიდებიან

28 ნოემბერს, მინარეთის დაბრუნებიდან მეორე დღეს, ჭელაში, იქ სადაც სამღვდელოებაა შეკრებილი, ამ დრომდე არცერთი ადგილობრივი ქრისტიანი არ გამოჩენილა. "სამხრეთის კრიბჭეს" მათი მოსაზრების მოსასმენად კარდაკარ მოუხდა სიარული. ქრისტიანი მოსახლეობის უმრავლესობა დღეს სახლიდან არ გამოდის.

ერთ-ერთმა ქალბატონმა მოგვიბოდიშა და გვითხრა, რომ ვერ დაგველაპარაკებოდა. ერთ-ერთი შუახნის ქალბატონი კი გზაზე შეგვხვდა და როგორც კი მინარეთზე შეკითხვა დავუსვით, გვითხრა, რომ ეს მისი საქმე არაა.

სასულიერო პირმა, რომელიც კარდაკარ ჩაწერის პროცესში შეგვხვდა, გვთხოვა, რომ ქრისტიანებისთვის მოსაზრება არ გვეკითხა: "ძალიან გთხოვთ, ქრისტიანებს ამ თემაზე ნუ დაელაპარაკებით. ისინი დაშინებული არიან. ყველა ძალიან მეცოდება".

ადგილობრივი ხათუნა ქაფიანიძე კი ჩვენთან საუბარში ამბობს, რომ მინარეთის დემონტაჟის გამო მეზობლები გაუნაწყენდნენ: "აღარ მინდა აღარაფრის თქმა, იმიტომ, რომ როცა მინარეთი აიღეს გარშემო ყველა მომემდურა. ამიტომ სამი თვე სახლიდან არ გამოვდივარ. ეს უბანი საერთოდ აღარ მელაპარაკება".

ჭელაში მცხოვრები ავთო ქაფიანიძე ამბობს, რომ თუ მთავრობამ გადაწყვიტა მინარეთის დადგმა, ესე იგი უნდა დაიდგას:
"თუ მთავრობამ მიიღო გადაწყვეტილება, რომ დაიდგას, მე რა შუაში ვარ. ხელს არ მიშლის ეს მინარეთი. ილოცონ, ნუ იყვირებენ. ისე იყვნენ, გაუმარჯოთ ღმერთმა. კაცმა ილოცოს სადაც უნდა, ოღონდ ხელს ნურავის შეუშლის".

"მინარეთის რა გითხრა, მაგრამ მეჩეთი უნდა ყოფილიყო და იყოს. არც მინარეთი არაფერს გვიშლის, ოღონდ იქიდან ნუ იყვირებენ. თუ არ იყვირებენ იდგეს, რას გვიშლის", - ამბობს ადგილობრივი მერი მუმლაძე.

შეგახსენებთ, სოფელ ჭელის მეჩეთთან მინარეთი დემონტაჟიდან სამი თვის შემდეგ, 27 ნოემბერს, გვიან ღამით, სამ საათში დააბრუნეს. მუსლიმებმა მინარეთის დაბრუნების ნებართვა ადიგენის საკრებულოსგან მას შემდეგ მიიღეს, როცა ყველა დოკუმენტაცია მოაწესრიგეს.

[sknews.ge]