ჭელაში მცხოვრები მუსლიმები ფიქრობენ, რომ ქრისტიანები არ დაუპირისპირდებიან

ჭელის მეჩეთის წინამძღვარს ჯამბულ აბულაძეს მინარეთის დადგმის გამო სოფელში დაპირისპირებისა და ვითარების დაძაბვის არ ეშინია. იგი ამბობს, რომ მინარეთის დასაბრუნებლად მომზადებულები იყვნენ, ვინაიდან ბოლო ერთი თვეა ამ მიმართულებით აქტიურად მუშაობდნენ და ყველა დოკუმენტაცია მზად ჰქონდათ.

რაც შეეხება კითხვას, რატომ მონტაჟდება მინარეთი გვიან ღამით, ჯამბულ აბულაძე გვპასუხობს: "ეს ისეთი სპეციფიკური თემაა, რომ ვიფიქრეთ ასე აჯობებდა".

მისივე თქმით, პროვოკაციის საფრთხე არ არსებობს: "არამგონია, რომ ვითარება კიდევ დაიძაბოს. ყველა ადამიანი უნდა დაუფიქრდეს თავის საქციელს, ერთი ქვეყნის შვილები ვართ, ყველა ქართველები ვართ, უბრალოდ სხვადასხვა აღმსარებლობის, ყველამ ხელი უნდა ჩავჭიდოთ ერთმანეთს და მშვიდად ვიცხოვროთ ამ ქვეყანაში".

დაპირისპირებას გამორიცხავს ჭელაში მცხოვრები მუსლიმი ხვიჩა შანთაძეც.

"არამგონია, რომ მინარეთის დადგმამ სოფლის მცხოვრებლები ერთმანეთს დაუპირისპიროს", - ამბობს იგი.

28 ნოემბერს, ღამის 02:00 საათზე ჭელის მეჩეთთან მინარეთის დამონტაჟება თითქმის დასრულდა. ჯამბულ აბულაძის თქმით, მხოლოდ ბოლო დეტალებია გასაკეთებელი.

ამ წუთებისთვის სოფლამდე მისასვლელი გზა კვლავ გადაკეტილია. მეჩეთის ირგვლივ კვლავ იმყოფებიან სამართალდამცავები, რომლებიც ჟურნალისტებს მეჩეთთან მიახლოვების საშუალებას არ აძლევენ. მეჩეთთან იმყოფება შსს სამცხე-ჯავახეთის სამხარეო სამმართველოს უფროსი თეიმურაზ კალანდაძეც.

შეგახსენებთ, 27 ნოემბერს, გვიან ღამით, მას შემდეგ რაც ადიგენის საკრებულოსგან ნებართვა მიიღეს, ჭელაში მცხოვრებმა მუსლიმური თემის წარმომადგენლებმა, მოჭრილი და დასაწყობებული მინარეთის მეჩეთთან დაბრუნება დაიწყეს.

[sknews. ge]