‘ჭორია, არავის დავუსახელებივარ’ - იქნებიან თუ არა ჩიტაშვილი და რაისიანი ენმ-ს კანდიდატები

6 აგვისტოს, საინფორმაციო სააგენო "ინტერპრესნიუსმა" გაავრცელა ინფორმაცია, სადაც ნათქვამია, რომ 2020 წლის არჩევნებზე “ერთიანი ნაციონალური მოძრაობის“ მაჟორიტარი დეპუტატობის კანდიდატების ნაწილის ვინაობა ცნობილი გახდა.

მათ შორის არიან კანდიდატები სამცხე-ჯავახეთის ოლქებიდან. კერძოდ,

ახალციხე-ადიგენი-ასპინძა-ბორჯომის ოლქში - ვაჟა ჩიტიშვილი

ახალქალაქი-ნინოწმინდის ოლქში - მელიქ რაისიანი

აღნიშნულ ინფორმაციას უარყოფს ვაჟა ჩიტაშვილი და ამბობს, რომ „ნაციონალური მოძრაობის“ მხარდამჭერი ნამდვილად არის, თუმცა კანდიდატად დასახელების შესახებ მასთან საუბარი არ ყოფილა: „არაფერი მსგავსი არ შემოუთავაზებიათ, ეს არის ჭორი. არ დავუსახელებივარ არავის. არც პოლიტსაბჭოს სხდომაზე ვყოფილვარ, ისიც კი არ ვიცი როდის გაიმართა“.

მისივე თქმით, იმ შემთხვევაში თუ პარტია მაჟორიტარობის კანდიდატობას შესთავაზებს, იფიქრებს, თუმცა თავს არცერთი პარტიის წევრად მოიაზრებს: „თუ შემომთავაზებენ, არ ვიცი, დავფიქრდები, არ ვარ არცერთი პარტიის წევრი, მანდატი ჯიბეში არ მდებია არასდროს. მხარდაჭერით, რა თქმა უნდა, „ნაციონალურ მოძრაობას“ ვუჭერ მხარს“ – გვითხრა ვაჟა ჩიტაშვილმა.

ჩიტაშვილისგან განსხვავებით, გავრცელებულ ინფორმაციას ადასტურებს მელიქ რაისინი და ამბობს, რომ 6 აგვისტოს პოლიტსაბჭოს სხდომაზე თავადაც იმყოფებოდა და მაჟორიტარობის კანდიდატად ნამდვილად დაასახელეს: „გუშინ გაიმართა „ნაციონალური მოძრაობის“ ცენტრალურ ოფისში სხდომა, სადაც ჯავახეთის ოლქში მე დამასახელეს, სამცხის ოლქში კი, ვაჟა ჩიტაშვილი“, - განმარტა „სამხრეთის კარიბჭესთან“ რაისიანმა.

ასე გამოიყურება "ნაციონალური მოძრაობის" მაჟორიტარების კანდიდატების სრული სია :

ნიკა მელია - თბილისი (გლდანი)

ლევან ხაბეიშვილი - თბილისი (სამგორი)

დავით კირკიტაძე - რუსთავი

გრიგოლ ვაშაძე - ქუთაისი

აზერ სულეიმანოვი - მარნეული

ხატია დეკანოიძე - თერჯოლა-ტყიბული-ზესტაფონი-ბაღდათი

ლევან ბეჟაშვილი - გურაჯაანი-სიღნაღი-დედოფლისწყარო-საგარეჯო

გიორგი ბოტკოველი - თელავი-ახმეტა-ყვარელი-ლაგოდეხი

ბადრი ბასიშვილი - გორი-კასპი

ვაჟა ჩიტიშვილი - ახალციხე-ადიგენი-ასპინძა- ბორჯომი

მელიქ რაისიანი - ახალქალაქი-ნინოწმინდა

დევი ჭანკოტაძე - სამტრედია- წყალტუბო

ჯერ-ჯერობით უცნობია, წარადგენს თუ არა პარტია მაჟორიტარებს დანარჩენ ოლქებში.

სამცხეში, ახალციხე-ადიგენი-ასპინძა-ბორჯომის ოლქში "ნაციონალური მოძრაობის" მაჟორიტარობის კანდიდატად ვანო მერაბიშვილი სახელდებოდა, თუმცა მან 3 აგვისტოს განაცხადა, რომ არჩევნებში მონაწილეობას არ მიიღებდა.

[რობი ზარიძე]