ჭელაში, სადაც მინარეთს აბრუნებენ, სასულიერო პირები გამოჩნდნენ

ჭელის მეჩეთის ეზოში ამ წუთებში სოფელ დიღომის წმინდა მარინეს სახელობის ტაძრის წინამძღვარი მამა დავით ისაკაძე, ჭელაში მართლმადიდებლური ეკლესიის მშენებელი ბერდია ქაფიანიძე და კიდევ ერთი სასულიერო პირი იმყოფება.

მამა დავით ისაკაძე ამბობს, რომ ეს მიწა ქართველი ხალხის სისხლით არის გაპოხილი და ისევ ქართველი ხალხი მინარეთს აშენებს ზედ, რაც დაუშვებელია: "რა სიტყვებით უნდა გადმოვცე და როგორ უნდა გადმოვცე. მინარეთს უშენებენ აქ ჩვენი წინაპრების მარბეველებს. მოსვლა ვერ მოვასწარით, მაშინაც, როცა ფერიას მთაზე ეკლესია დაანგრიეს, მისვლა იქაც დაგვაგვიანდა. ჩვენ დავაგვიანეთ იქ მისვლა, მაგრამ ჩვენ მაშინ ვთქვით, რომ ეს ხელისუფლება ტრაგიკულად დაასრულებდა მოღვაწეობას. ვგულისხმობ იმას, რომ როგორც ტაძრის დანგრევა არ შეიძლება, ასევე არ შეიძლება მინარეთების და მეჩეთების აშენება".

მამა დავითი ამბობს, რომ საქართველოში მცხოვრებ მუსლიმებს საკმარისი მეჩეთები აქვთ. მინარეთს იმიტომ ამონტაჟებენ, რომ მოძახილი გააკეთონ. მას არ სჯერა მუსლიმების მტკიცების, რომ მოლა მინარეთიდან მოძახილს არ გააკეთებს. იგი ამბობს, რომ მინარეთებისა და მეჩეთების მშენებლობის საკითხი რეფერენდუმით უნდა გადაწყდეს: "გერმანიაში, შვეიცარიაში, რეფერენდუმი ჩაატარეს. რატომ არ გვეკითხებიან ჩვენ?! მოვითხოვთ რეფერენდუმს".

მისივე თქმით, მინარეთის დაბრუნებას მთელი საქართველოს ქრისტიანები გააპროტესტებენ.

"ტელევიზორს ვუყურებდი, რომ გავიგე, ავდექი და წამოვედი. ორი სასულიერო პირი ვართ აქ, მე და მამა გაბრიელი. არავისთვის არ მითქვამს, მაგრამ ხვალ [ახლა ღამის 01:30 საათია. ს.კ.] ყველა გაიგებს. ვინც მონაწილეობს ამ ამბავში, ღვთის წინაშე აგებს პასუხს", - ამბობს მამა დავით ისაკაძე.

შეგახსენებთ, 27 ნოემბერს, გვიან ღამით, ჭელაში მუსლიმებმა მინარეთის დამონტაჟება დაიწყეს. წვიმის მიუხედავად, სამუშაოები ამ წუთებშიც გრძელდება.

[sknews.ge]