უბედური შემთხვევა თუ თვითმკვლელობის მცდელობა - რას ჰყვებიან ოჯახის წევრები ადიგენში მომხდარზე

დაჭრილის დედა თვითმკვლელობის მცდელობას გამორიცხავს და ამბობს, რომ ბექამ სახლიდან იარაღი სავარაუდოდ მელიების მოსაკლავად გაიტანა და ამ დროს მოხდა უბედური შემთხვევა.

„დილით ადრე იყო საპირფარეშოში და უკან დაბრუნდა, მაგრამ მეორედ როდის გავიდა, ან იარაღი როდის გაიტანა არ ვიცი. არასდროს გაუსროლია, არ იცის გამოყენება, გეკოს ტიპის იარაღია, აჩუქეს. თვითმკვლელობის მცდელობას ვერ დავიჯერებ, ეს რატომ უნდა გაეკეთებინა?! იმდენი გეგმა აქვს. გასროლის დროს ჩვენც ეზოში ვიყავით, მაგრამ გვეგონა მეზობელმა მელიების დასაფრთხობად „ხლაპუშკა“ გაისროლა. ამ დროს ბექას მეუღლის ბიძამ დაგვირეკა და იკითხა – ბექა რატომ არ მპასუხობსო? ამ ზარის შემდეგ სამივენი (ბექას მეუღლე, დედა და მამა) გავცვივდით და საპირფარეშოში ვნახეთ“, – იხსენებს „სამხრეთის კარიბჭესთან“ ბექა გოგრიჭიანის დედა.

დაჭრილი ახალგაზრდა სასწრაფო სამედიცინო დამხარების ჯგუფმა პირველად ახალციხის რეფერალურ ჰოსპიტალში გადაიყვანა. ექიმების განმარტებით, მას მარჯვენა საფეთქლის არეში გამჭოლი ჭრილობა აქვს.

პირველადი დახმარების აღმოჩენის შემდეგ ბექა გოგრიჭიანი თბილისში, „ჯერარსის“ კლინიკაში გადაიყვანეს. მისი მდგომარეობა უკიდურესად მძიმეა.

„მდგომარეობა არის უკიდურესად მძიმე, კრიტიკული. გამოხატულია ცეცხლსასროლი ჭრილობის შედეგად მიყენებული ქალა ტვინის მძიმე ტრავმა. მართვით სუნთქვაზე იმყოფება და უგრძელდება სასიცოცხლო ფუნქციების ხელოვნური ჩანაცვლება“,- განმარტეს კლინიკაში.

მარჯვენა საფეთქელზე გამჭოლი ჭრილობის გამო, ადგილობრივები არ გამორიცხავენ თვითმკვლელობის მცდელობასაც, თუმცა რა შეიძლება ყოფილიყო ამის მიზეზი, არ იციან.

შსს-მ გამოძიება სსკ-ს 115 მუხლით, თვითმკვლელობამდე მიყვანისა და 236-ე მუხლით, იარაღის მართლსაწინააღმდეგო შეძენა-შენახვის ტარების მუხლით დაიწყო. ბექას მეუღლე და ორი წლის შვილი ჰყავს.


შემთხვევის ადგილი

[მარიამ ბარძიმაძე]