ტრაგედია აწყურში – მეზობლები მამაკაცის თვითმკვლელობის მიზეზებზე საუბრობენ

„ძლიერი ადამიანი იყო, ვერავინ წარმოიდგენდა, რომ ოდესმე თავს მოიკლავდა“, – ასე იწყებენ გარდაცვლილ გ.კ.–ზე საუბარს მისი მეზობლები. აწყურში იმასაც ამბობენ, რომ მომხდარის სავარაუდო მიზეზი ცოლის ერაყში წასვლას უკავშირდება. ასევე სავარაუდოდ ამ მიზეზით, ცოლ–ქმარს, ბოლო ერთი კვირა, უსიამოვნება ჰქონდა.

ახალციხის მუნიციპალიტეტის სოფელ აწყურში, სოფლის გაღმა მხარეს, ცეცხლსასროლი იარაღიდან გასროლის ხმა გუშინ, 9 ივნისს, დაახლოებით 23:00 საათზე გაიგეს.

„ნასვამი იყო. უსიამოვნება მოუვიდა ოჯახში და ამის გამო მოიკლა თავი. ძალიან კარგი და მშრომელი ადამიანი იყო“, – ამბობს გარდაცვილის მეზობელი ნუნუ მახათაძე.

მისივე თქმით, გ.კ–მ თავი საკუთარი სახლის გვერდით, სანადირო თოფით მოიკლა: „ჩხუბის დროს ცოლი გარდაცვლილის დედამ საკუთარ სახლში წაიყვანა, გაარიდეს. ამის შემდეგ გავიგონეთ თოფის ხმა. რომ ჩამოვედი, კაცი უკვე ხრიალებდა, ტყვია გულში ჰქონდა მოხვედრილი“.

„ცოლი, 10 თვე ერაყში იყო წასული, ერთი კვირაა დაახლოებით რაც ჩამოვიდა მაგათ სახლიდან სხვა დროს ჩხუბის ხმა არ გამოსულა. სხვა არაფერი ვიცი“,– ამბობს აწყურში მცხოვრები ლამარა ლაბაძე.

გარდაცვლილის ახლობლებს მომხდარის შესახებ საუბარი არ სურთ. აწყურში გამგებლის წარმომადგენელი კი განმარატვს, რომ მიზეზი გარდაცვლილის მეუღლის ერაყში გამგზავრებას უკავშირდება.

„ერთი კვრაა რაც მისი მეუღლე საზღვარგარეთიდან დაბრუნდა, ისევ უნდოდა წასვლა, ამის გამო იჩხუბეს და მამაკაცმა თავი მოიკლა“, – ამბობს ელგუჯა ჯვარიძე.

გამოძიება სსკ-ის 115-ე მუხლით მიმდინარეობს, რაც თვითმკვლელობამდე მიყვანას გულისხმობს.

გარდაცვლილს მეუღლე და ორი შვილი დარჩა.

[თინათინ ზაზაძე, ახალციხე]