‘აგვისტოში 1 500-მდე ვაკანსია გამოცხადდება’ - მასწავლებელთა ეროვნული ცენტრი

როგორც მასწავლებელთა პროფესიული განვითარების ეროვნული ცენტრის დირექტორის მოადგილე, მანანა რატიანმა „სამხრეთის კარიბჭეს“ გადაცემა „საფეხურში“ განაცხადა, მაღალმთიან სოფლებში, სადაც რომელიმე საგნის მასწავლებელი არ ეყოლებათ, სწავლებას დისტანციურ რეჟიმში განახორციელებენ.

„მაღალმთიან სოფლებში ტექნიკურ საგნებში კადრების პრობლემაა, მაგრამ დისტანციური სწავლებითაც შესაძლებელია ამ კადრების შევსება. მნიშვნელოვანია საგნებს ასწავლიდნენ არა შეთავსებით სხვა საგნების მასწავლებლები, რომლებიც არ არიან კვალიფიციურები იმ მიმართულებაში, არამედ საგნის პროფესიონალები და ამას შეძლებს დისტანციური სწავლება, რომ შეავსოს ეს ადგილები“.

მისივე თქმით, პანდემიამდე სააგენტოს ქვეყნის 40 სკოლაში დანერგილი ჰქონდა დისტანციური სწავლება, რაც ხელს შეუწყობს მომავალშიც რომ არსებული პრაქტიკა გამოიყენონ: „ყველა სკოლა უზრუნველყოფილი იყო და ჰქონდა ერთი ოთახი, სადაც კომპიუტერული ტექნიკა იყო და ბავშვები თავმოყრილები იყვნენ იმ ოთახში, ფასილიტაციას უწევდა სკოლის წარმომადგენელი და შესაბამისად, გადიოდნენ საგნებს. ახლა შესაძლებელია სკოლაში ერთ ლაბორატორიაში, ერთ კომპიუტერთან წარიმართოს ეს პროცესი“.

რაც შეეხება სკოლებში არსებული ვაკანტური ადგილების შევსებას, მანანა რატიანი ამბობს, რომ ამისი პრობელმა არ იქნება: „არაერთ უნივერსიტეტს აქვს მოკლევადიანი და ბაკალავრიისა და მაგისტრატურის ინტეგრირებული 300 კრედიტიანი პროგრამა, ასევე 60 კრედიტიანი საუნივერსიტეტო პროგრამები. მაგალითად, სტუდენტები, რომლებსაც გამოცდებიც ჩაბარებული აქვთ და 60 კრედიტიანი სწავლაც დაასრულეს, მზად არიან, რომ შევიდნენ უფროს მასწავლებლებად სისტემაში“.

[თაკო ფეიქრიშვილი]