რას გულისხმობს ახალი ტიპის მასწავლებლების მომზადების პროგრამა

„მასწავლებლის ეროვნულმა სკოლამ“ სემინარები ახალციხის მესამე და მეორე საჯარო სკოლებში დღეიდან, პირველი ნოემბრიდან დაიწყო.

შერჩეული მასწავლებლები და მასწავლებლობის მსურველები აღნიშნული პროგრამის ფარგლებში თითოეულ საგანში ცხრადღიან ტრენინგს გაივლიან. ახალციხის მესამე სკოლაში ტრენინგები ბიოლოგიაში დაიწყო.

„პროგრამა გულისხმობს იმას, რომ მასწავლებლები დახელოვნდნენ მომიჯნავე საგნებში და გაკვეთილების ჩატარება შეძლონ. მაგალითად თუ ბიოლოგიას ასწავლის, ამ პროგრამის გავლის და სერტიფიკატის აღების შემდეგ, შეეძლება მისი მომიჯნავე საგანი ქიმიაც ასწავლოს. ამ შემთხვევაში მასწავლებელს ორი საგნის დიპლომი უნდა ჰქონდეს“, – ამბობს მასწავლებლის პროფესიული განვითარების ეროვნული ცენტრის ტრენერ–კონსულტანტი მარინა სეხნიაშვილი.

მისივე თქმით, ცხრადღიან ტრენინგში მთლიანი საგნის სწავლა შეუძლებელია: „ამ პერიოდის განმავლობაში ჩვენ შეგვიძლია გავააქტიუროთ მათი წინარე ცოდნა, მითუმეტეს წინასწარ ჩვენ მათ ვუგზავნით საკითხავ მასალას და ე. წ. შებრუნებულ საკლასო ოთახის მეთოდს. აქ მონაწილეები რეგიონის მასშტაბით არიან“.

გარდა ამისა, სეხნიაშვილმა აღნიშნა, რომ კურსის დასრულების შემდეგ სერტიფიკატი მხოლოდ იმ მონაწილეებს გადაეცემათ, ვისაც ტრენინგებზე 80%–იანი დასწრება ექნება და დავალებებსაც აქტიურად შეასრულებს.

„ასევე, გვაქვს შუალედური საშინაო დავალებები და შესრულების მიხედვით ფასდებიან. ბოლოს გვაქვს 50 ქულიანი შემაჯამებელი ტესტირება. მინიმუმ 25 ქულა მაინც უნდა მიიღონ რომ სერტიფიკატი გადაეცეთ“,– თქვა სეხნიაშვილმა.

განათლების რეფორმის ფარგლებში, სკოლებში ხარისხიანი განათლების უზრუნველსაყოფად დაარსდება „მასწავლებლის ეროვნული სკოლა“, რომელიც წლის ბოლომდე 2 000-მდე მასწავლებლობის მსურველს მოამზადებს.

პროგრამის მონაწილეები მომზადების კურსს მომიჯნავე საგნებში გაივლიან. შედეგად, ერთი ადამიანი შეძლებს სკოლაში რამდენიმე საგანი ასწავლოს (ფიზიკა, მათემატიკა, ICT), ან (ბიოლოგია და ქიმია), (ისტორია, გეოგრაფია, სამოქალაქო განათლება), (სახვითი და გამოყენებითი ხელოვნება/მუსიკა), განათლების დაწყებითი საფეხური (ქართული, მათემატიკა, ბუნებისმეტყველება).

მსმენელები მომზადდებიან ასევე ქართულ ენასა და ლიტერატურაში და ფიზიკურ აღზრდაში (სპორტი).

პროგრამის ამოქმედების შემდგომ, მაღალმთიან და მცირეკონტიგენტიან სოფლის სკოლებში აღმოიფხვრება მასწავლებლების დეფიციტი, რომელიც წლების განმავლობაში არსებობდა.

პროგრამის მონაწილეები წინასწარ გაეცნობიან შესაძლო ვაკანტურ ადგილებს იმ სკოლებში, სადაც მასწავლებელთა დეფიციტია. ეს კი მათი დასაქმების შანსს ზრდის.

კურსდამთავრებულები სკოლებში მაძიებლის სტატუსით შევლენ, ჩაერთვებიან სპეციალურ პროგრამაში, რაც მათ საშუალებას მისცემს სწავლების პარალელურად გაიარონ დისტანციური კურსი და გახდნენ უფროსი მასწავლებლები. უფროსი მასწავლებლის სტატუსის მოპოვებამდე სამინისტრო მათ სპეციალურ სახელფასო დანამატს დაუწესებს.

[მარიამ ბარძიმაძე, ახალციხე]