როგორ უნდა დასაქმდნენ 'მასწავლებლის ეროვნული სკოლის მონაწილეები'

ეროვნული სკოლის მონაწილეებს, რომლებმაც კურსი წარმატებით დაასრულეს, „მასწავლებელთა პროფესიული განვითარების ეროვნული ცენტრი“ დამადასტურებელ სერთიფიკატს გადასცემს. პროცესი თბილისიდან დაიწყება და საქართველოს რეგიონებში გაგრძელდება.

კურსის მონაწილეებს საშუალება აქვთ სკოლების მიერ გამოცხადებულ ვაკანსიაზე განაცხადი შეავსონ და კონკურსი გაიარონ: „მასწავლებელთა პროფესიული განვითარების ეროვნული ცენტრის“ საიტია pedagogi.ge, სადაც ყოველდღიურად ხდება ვაკანსიების განახლება, მათ უნდა მოიძიონ სასურველი ვაკანსია, გაივლიან კონკურსს სკოლის დირექციასთან და ადმინისტრაციასთან და დასაქმდებიან სკოლაში, რომლის მაგალითიც უკვე არსებობს”, - ამბობს „სამხრეთის კარიბჭესთან“ მასწავლებლის ეროვნული სკოლის ხელმძღვანელი, ნინო გორდეზიანი.

მისივე თქმით, სკოლის ძირითადი მიზანი ის იყო, რომ მომზადებულიყვნენ ახალი ტიპის მასწავლებლები, რომლებიც ერთ, ორ ან სამ საგანს ასწავლიან: „ჩვენ გვქონდა კურსი ფიზიკის, მათემატიკისა და ინფორმაციის ტექნოლოგიების, ანუ ამ ადამიანს ჩვენ მივეცით ცოდნა სამი საგნის მიმართულებით, მას შეუძლია ერთ სკოლაში დასაქმდეს და ასწავლოს სამივე საგანი. კონკურსი არის კონკურსი და სკოლის დირექცია იღებს გადაწყვეტილებას ვინ დაასაქმოს სკოლაში. ჩვენ მოვამზადეთ კადრები, მაგრამ კონკურსის წესით უნდა გავიდნენ ისინი“.

რაც შეეხება იმას, მიიღებენ თუ არა სკოლის მონაწილეები დამატებით ანაზღაურებას დასაქმების შემთხვევაში, გორდეზიანი ამბობს, რომ ეს ჯერ გადაწყვეტილი არ არის: „ანაზღაურებაზე პასუხს ჯერ ვერ გეტყვით, მე ვარ პროგრამის ხელმძღვანელი და შემსრულებელი“.

„მასწავლებლის ეროვნულმა სკოლამ“ ფუნქციონირება განათლების სამინისტროს ეგიდით, 2019 წლის ოქტომბრიდან დაიწყო. მას „მასწავლებელთა პროფესიული განვითარების ეროვნული ცენტრი“ ახორციელებს.

პირველ ეტაპზე სკოლის გავლის მსურველებმა შერჩევის პროცედურა გაიარეს, რომელიც მოიცავდა გასაუბრებასა და ტესტირებას.

პირველი ნოემბრიდან, სხვადასხვა საგნობრივი მიმართულებებით მოხდა მასწავლებლებისა და მასწავლებლობის მსურველთა გადამზადება.
სასწავლო კურსები მთელი საქართველოს მასშტაბით მიმდინარეობდა, ყოველ პარასკევს, შაბათსა და კვირას. სხვადასხვა საგნობრივ მიმართულებას განსხვავებული საათობრივი დატვირთვა ჰქონდა.

თეორიული კურსის გავლის შემდეგ, პროგრამის ფარგლებში მონაწილეებმა, თეორიული პრაქტიკა სკოლებში, მასწავლებლის მენტორობით გაიარეს.

კონკურსში რეგისტრაცია 4 000-ზე მეტმა ადამიანმა გაიარა. 2019 წლის პირველი ნოემბრიდან 1 759 მსმენელმა გაიარა „მასწავლებლის ეროვნული კურსი“, თუმცა წარმატებით 1500-მა მსმენელმა დაამთავრა.

[თაკო ფეიქრიშვილი, ახალციხე]