'ჩვენ ვაძლევთ და საჭიროების მიხედვით განკარგავენ' – ბორჯომის მერიამ ეპარქიას 4 წელში 759 640 ლარი გადაურიცხა

ინფორმაციას "აი ფაქტი" ავრცელებს. მათ მიერ გამოთხოვნილი ინფორმაციის თანახმად, 2016–დან 2020 წლის ჩათვლით, მერიამ ყველაზე მეტი თანხა ბრჯომის ეპარქიას 2019 წელს, 218 000 ლარი გადაურიცხა.

ოთხი წლის მონაცემები ასეთია:

2016 წელი – 170 000 ლარი;

2017 წელი – 130 000 ლარი;

2018 წელი – 159 140 ლარი;

2019 წელი – 218 000 ლარი'

2020 წელი – 82 500 ლარი (მაისის ჩათვლით);

ბორჯომის მერიაში "სამხრეთის კარიბჭესთან" განმარტეს, რომ მუნიციპალიტეტი ეპარქიას თანხას ყოველწლიურად ურიცხავს, ისინი კი "საჭიროების მიხედვით განკარგავენ".

სასულიერო პირები აცხადებენ, რომ ადგილობრივი თვითმმართველობიდან გამოყოფილი თანხები ეკლესიების მშენებლობასა და რესტავრაციას ხმარდება, მხოლოდ საპატრიარქოს დაფინანსებით კი ამას ვერ შეძლებენ.

"ვიცი რომ ფოთოლეთის მონასტერში სახურავი გამოიცვალა, ბორჯომში მდებარე წმინდა ნიკოლოზის სახელობის ეკლესია იხატება (მარტო გუმბათი დარჩა) და მის გვერდით შენობა გაკეთდა. ეკლესია გავაკეთეთ საკოჭავში, აქ დაიხარჯა თანხები, მაგრამ კონკრეტულად რამდენი ვერ გეტყვით. ეს ყველაფერი გაკეთდა ამ სამ წელში, რაც მეუფე ჩამოვიდა", – ამბობს ბორჯომის აღმაშენებლის სახელობის ტაძრის წინამძღვარი მამა არჩილი.

ბორჯომისა და ბაკურიანის ეპარქიის ხელმძღვანელად ეპისკოპოსი ლაზარე 2017 წელს დაინიშნა, მასთან დაკავშირება "სამხრეთის კარიბჭემ" ვერ შეძლო, აღმაშენებლის სახელობის ტაძრის წინამძღვარმა განაცხადა, რომ ეპისკოპოსი ეპარქიაში არ არის და მის ტელეფონის ნომერსაც ვერ მოგვცემს.

[თინათინ ზაზაძე]