ევროკავშირი სომხეთსა და აზერბაიჯანს მოუწოდებს შეიარაღებული დაპირისპირება შეწყვიტონ

ფოტო: რადიო თავისუფლება

„სომხეთმაც და აზერბაიჯანმაც მათ საზღვარზე სერიოზული ინციდენტების შესახებ განაცხადეს, რომელშიც ჩართული იყო მძიმე შეიარაღება. სამწუხაროა, რომ ამას მსხვერპლი მოყვა. ევროკავშირი მოუწოდებს ორივე მხარეს, შეწყვიტონ შეიარაღებული კონფრონტაცია, თავი შეიკავონ ქმედებებისა და რიტორიკისგან, რომელსაც დაძაბულობის პროვოცირება შეუძლია და დაუყოვნებლივ მიიღონ ზომები შემდგომი ესკალაციის პრევენციისთვის.

ევროკავშირი მხარეებს მოუწოდებს, დაიცვან ცეცხლის შეწყვეტის რეჟიმი, ენერგია და რესურსები მიმართონ კორონავირუსის პანდემიის წინააღმდეგ ბრძოლისკენ“, - ნათქვამია ევროკავშირის მიერ ორშაბათს გავრცელებულ განცხადებაში.

გუშინ ყარაბაღის კონფლიქტის ზონაში შეიარაღებული დაპირისპირება მოხდა, რის შედეგადაც, აზერბაიჯანული მხარის განცხადებით, მათი ორი სამხედრო მოსამსახურე დაიღუპა, ხუთი კი დაიჭრა.

სომხური მხარე აცხადებს, მომხდარის შედეგად სომხეთის სამხედრო მოსამსახურეები არ დაღუპულან და დანაკრგი მხოლოდ აზერბაიჯანს აქვს.

სომხეთის პრემიერ-მინისტრმა განაცხადა, რომ „საზღვარზე სიტუაციის გამწვავება აზერბაიჯანის ხელმძღვანელობის სურვილს უკავშირდება, ქვეყანაში არსებული შიდა პრობლემები გადაფაროს“.

[sknews.ge]