აბიტურიენტები ეროვნულ გამოცდებს ისტორიაში აბარებენ

რეგისტრაცია 08:00 საათზე დაიწყო. ისტორიაში გამოცა დღეს ორ სესიად ტარდება. პირველი სესიიდან გამოსულმა აბიტურიენტებმა გვითხრეს, რომ ტესტში საკითხები ძირითადად მსოფლიო ისტორიიდან იყო, მიუხედავად ამისა, დაწერა არ გაუჭირდათ.

„ვფიქრობ რომ კარგად დავწერე ტესტი, იყო რამდენიმე რთული, თუმცა დრო მაინც მეყო. განსაკუთრებით ბევრი ტექსტის ანალიზზე ვიფიქრე, ტექსტი ქართლის ცხოვრებიდან იყო მოყვანილი, ვფიქრობ რომ უმაღლესი ქულის ნახევარს მაინც მივიღებ გამოცდაში, ერთი წელი ვემზადებოდი და იმედი მაქვს რომ ჯავახიშვილში დაწყებითების ფაკულტეტზე მოვხვდები“, -ამბობს აბიტურიენტი ლიკა კოსოშვილი.

ლინდა მარკოიძე გამოცდებისთვის 10 თვის განმავლობაში ემზადებოდა. დღევანდელი, ისტორიის გამოცდა მისთვის საკმაოდ მარტივი აღმოჩნდა. მას, ჩაბარება საერთაშორისო ურთიერთობებისა და დიპლომატიის ფაკულტეტზე სურს.

„საერთოდ არ იყო რთული და ყველფერი ძალიან მარტივი ფორმით იყო შერჩეული და გადმოცემული. არამგონია რომ საერთოდ ვინმეს გაუჭირდეს“, - ამბობს ლინდა.

თუმცა გამოცდიდან ისეთი აბიტურიენტებიც გამოვიდნენ, რომლებისთვისაც ტესტი მარტივი არ აღმოჩნდა.

„რუკა იყო რთული განსაკუთრებით, ვცდილობდი დროში ჩავტეულიყავი“, – გვითხრა ერთ-ერთმა აბიტურიენტმა.

გამოცდის ხანგრძლივობა 2 საათი და 40 წუთია. დღეს და ხვალ, 13 ივნისს აბიტურიენტები ისტორიას ორ სესიად აბარებენ.

ერთიანი ეროვნული გამოცდები 25 ივლისს დასრულდება.

[მარიამ ბარძიმაძე, ახალციხე]