აბიტურიენტები გამოცდას ისტორიაში აბარებენ

დილის სესიისათვის რეგისტრაცია 8:00 საათზე დაიწყო. ისტორიის გამოცდა ორი საათი და 40 წუთი მიმდინარეობს. აბიტურიენტების თქმით, ტესტი საშუალო სირთულის იყო.

„ვფიქრობ, რომ კარგად დავწერე, თუმცა ილუსტრაციები გამიჭირდა ძალიან. ვნახოთ, რა შედეგს მივიღებ“, – ამბობს ნანუკა გვირჯიშვილი.

ტესტი ისტორიაში თორნიკე ღამბაშიძემაც დაწერა. როგორც ამბობს, გამოცდისათვის კარგად მოემზადა. „სიმართლე გითხრათ, არ იყო ძალიან რთული. ერთ–ერთ ხელშეკრულებაზე დავფიქრდი, კონტინენტური ბლოკადის სახელით არის ცნობილი და ვერ ვიხსენებდი“, – ამბობს ღამბაშიძე.

ზოგი აბიტურიენტისათის კი რთული ტესტში მოცემული დახურული კითხვები აღმოჩნდა.

“დახურულ კითხვებს ორაზროვანი პასუხები ჰქონდა. დანარჩენი არ იყო რთული, მთავარია მომზადებული შესულიყავი“, – გვითხრეს აბიტურიენტებმა.

დილის სესიას 15 მეთვალყურე და 15 კურატორი აკვირდებოდა. მეორე სესიაზე რეგისტრაცია 14:00 საათზე დაიწყება.

[მარიამ ბარძიმაძე, ახალციხე]