ბაკურიანში სასტუმროები რეგულაციებს ფინანსური პრობლემების გამო ვერ ასრულებენ

ბაკურიანში მდებარე „სნოუ პლაზა“ პანდემიის შემდეგ არ გახსნილა, დაწესებულებამ რეგულაციების შესრულება ვერ შეძლო.

„პირველი მარტიდან დავიხურეთ და მას შემდეგ არ გავხსნილვართ. რეგულაციების გასავლელად ძალიან დიდი თანხებია საჭირო, რომლის მოსაძიებლადაც სესხის აღება გვიწევს. სხვა სესხიც მაქვს. ვიფიქრეთ პირველ ივლისს მაინც გავიხსნებოდით, რომ ზაფხულის სეზონს შევხვედროდით, მაგრამ არც ჯავშანი გვაქვს. ეს სეზონი ჩვენთვის ფაქტობრივად ჩავარდნილია“, – ამბობს სასტუმროს მენეჯერი ნანა ომანაძე.

როგორც, „სნოუ პლაზას“ მენეჯერი აცხადებს, ფინანსური პრობლემების გამო, მოუწია თანამშრომლების დროებით გათავისუფლება.

„ზამთარშიც პრობლემები იყო წყლის გამო და თითქმის არ გვიმუშავია. მოგვიწია თანამშრომლების გაშვება, რადგან ანაზღაურებას ვერ შევძლებდით. კარგია, რომ სახელმწიფოსგან თითოეული მათგანი 1 200 ლარიან დახმარებას მიიღებს, ყველაზე შევავსეთ განცხადებები“, – თქვა ომანაძემ.

სასტუმრო „ვილა ჯი ჯი“ გასული წლის დეკემბერში გაიხსნა. სასტუმროს გახსნიდან დღემდე არაერთი პრობლემის წინაშე დადგა. უჭირს რეგულაციების შესრულებაც.

„31 დეკემბერს გავხსენით სასტუმრო და 10 მარტს დავიკეტეთ შესაბამისად ვერ მოვახერხეთ ფინანსების მოგროვება. ყველა პრობლემა ერთად დაგვატყდა, არც ჯავაშანია და ფინანსებიც არ გვაქვს, რომ რეგულაციები შევასრულოთ. დახმარება არ შეგვხებია არაფერი, კადრების გაფორმებაც ვერ მოვასწარით, რომ მათ მაინც შეხებოდათ სახელმწიფოს ერთჯერადი დახმარება“, – ამბობს სასტუმრო „ვილა ჯი ჯი“–ის მენეჯერი თამარ მამუკელაშვილი.

სასტუმროს მეპატრონეები აცხადებენ, რომ სახელმწიფომ მათ ხელშეწყობაზე მაქსიმალურად უნდა იზრუნოს, უნდა შეამციროს რეგულაციები და სხვადასხვა ღონისძიებებისთვის მათი სასტუმროები გამოიყენოს.

„ჩვენ რაც შეგვეძლო მაქსიმალურად დავწიეთ ფასები, ვცდილობთ უსაფრთხო გარემო შევქმნათ და ვემზადებით დამსვენებლების მისაღებად. სახელმწიფომ უნდა იზრუნოს, ორგანიზება გაუკეთოს, მაგალითად, მოსწავლეები გამოუშვან დასასვენებლად, ან შეიმუშავონ გეგმა რომ დაგვეხმარონ“, – ამბობს ნანა ომანაძე.

ბაკურიანის ტურიზმის საინფორმაციო ცენტრში აცხადებენ, რომ კურორტში 500–ზე მეტი სასტუმროა (მათ შორის: საოჯახო ტიპის სასტუმროები, კოტეჯები და აპარტამენტები), აქედან რეგულაციების შესრულება მხოლოდ 21–მა მათგანმა შეძლო. რეგიონში კი სულ 66 სასტუმროა გახსნილი.

„ძალიან შემცირებულია მომართვიანობა წინა წლებთან შედარებით. ვცდილობთ, რომ სასტუმროების მეპატრონეებს დავეხმაროთ რეკომენდაციების შესრულებაში. სასტუმროები მიმართავენ ბორჯომის მერიას, ისინი კი ჩვენ გადმოგვცემენ სიას, მივდივართ და ვამოწმებთ, შემდეგ ვუგზავნით ჯანდაცვის სამინისტროს“, – განმარტა ბაკურიანის ტურიზმის საინფორმაციო ცენტრის მთავარმა სპეციალისტმა, მარიკა მაკიევმა.

ნახეთ: რა რეკომენდაციების დაკმაყოფილებაა საჭირო სასტუმროს გასახსნელად, აპლიკაციის შესავსებად ეწვიეთ ჯანდაცვის სამინისტროს.



[ნუკა სტეფნაძე, ბორჯომი]