ახალციხეში მდებარე სასტუმრო „ტურისტის“ მეპატრონე მანანა გოგოლაძე, ამ ეტაპზე ობიექტის ამუშავებას არ გეგმავს. ამბობს, რომ რეკომენდაციების შესრულება გაუჭირდება, რადგან ჩავარდნილი ტურისტული სეზონის გამო, საჭირო ინვენტარის საყიდელი თანხა არ აქვს.
„დისტანციური თერმომეტრი და დეზობარიერი არ მაქვს, არც სადეზინფექციო სითხეები. რადგან საოჯახო სასტუმროა ასევე გამიჭირდება მისაღების მინის ბარიერით გამოყოფაც. ყველაფერი ფულთანაა დაკავშირებული. ამ ყველაფრის გამო თავი შევიკავე, თუმცა შევეცდები რომ ნელ–ნელა ყველაფერი მოვაწესრიგო. ეს წელი რომ ტურისტულად ჩავარდნილია ყველამ ვიცით, სხვა რამის ილუზია არ უნდა გვქონდეს“, - ამბობს მანანა.
„ტურისტისგან“ განსხვავებით მუშაობის განახლებას გეგმავს სასტუმრო „ტიფლისი“, ობიექტის მეპატრონემ გახსნის ნებართვის მოსაპოვებლად, განაცხადი ჯანდაცვის სამინისტროს ვებგვერდზე უკვე შეავსო და ახლა ზედამხედველობის სამსახურიდან შემოწმებას ელოდება.
„დღეს ან ხვალ ველოდებით შემოწმებაზე უნდა მოვიდნენ. მისაღები რეკომენდაციებია, თუმცა დიდ თანხებთანაა დაკავშირებული მათი შესრულება, თუნდაც ის რომ ყოველ ორ საათში პირბადეები უნდა შევცვალოთ“, - ამბობს აბულაძე.
გახსნის ნებართვის მოპოვებაზე ფიქრობენ რაბათში მდებარე სასტუმროების „ოლდ რაბათის“, „კესანეს“ და „მილენიუმ რაბათის“ მეპატრონეებიც.
„აუცილებლად გავიხსნებით, ახლა სამზარეულოს ვაფართოვებთ. ჩვენთვის მარტივი არ იქნება ამდენი რეკომენდაციის შესრულება, ეს სტუმრისთვისაც არაკომფორტული იქნება, თუმცა მაქსიმალურად შევეცდებით შესრულებას“, - გვითხრა „კესანესა“ და „ოლდ რაბათის“ მეპატრონე ციალა შავაძემ.
„მე უკვე ინფორმირებული ვარ რა რეკომენდაციებიც გასცა ჯანდაცვის სამინისტრომ. შევიძინე რაც საჭირო იყო. ველოდები 15 ივნისს ტურიზმი რომ გაიხსნას. ამის შემდეგ ყველაფერს გავაკეთებ. რეგისტრაციასაც. არაფერი პრობლემური არაა. სწორად გაგება სჭირდება ამ რეკომენდაციებს. რთული რაც ეწერა ჭურჭლის რეცხვის პროცედურებია, მაგრამ მე ჭურჭლის მანქანა მაქვს და ამ პროცედურებს მიხსნის“, - განმარტეს სასტურო „მილენიუმ რაბათში“.
სასტუმროებს ეკონომიკური საქმიანობის განახლებისთვის, ჯანდაცვის სამინისტროს ვებგვერდზე
განაცხადის შევსება რვა ივნისიდან შეუძლიათ.
განაცხადის შევსების შემდეგ, ინფორმაცია ახალციხის ზედამხედველობის სამსახურს ეგზავნება, ისინი კი ამოწმებენ აკმაყოფილებს თუ არა სასტუმრო რეკომენდაციებს.
ახალციხის მუნიციპალიტეტის მერიის ზედამხედველობის სამსახურის უფროსის, მიშა მაკარიძის განმარტებით, ახალციხეში არსებული 60-მდე სასტუმროდან ამ ეტაპზე მათთან მხოლოდ 6 განაცხადი შევიდა, აქედან შემოწმების შემდეგ დადებითი პასუხი მხოლოდ ერთმა მიიღო.
„პირველივე ჯერზე შემოსული სამი განაცხადიდან სამივე დახარვეზდა, შემდეგ ერთი სასტუმრო, „ნიუ გრანდი“ თავიდან შევამოწმეთ და დადებითი პასუხი მიიღო. დღეს სამი სასტუმროს „პრესტიჟის“, „ტიფლისის“ და „რიოს“ განაცხადები გვაქვს“, - ამბობს მაკარიძე.
მისივე თქმით, დანარჩენმა სასტუმროებმა შემოწმების თარიღი გადადეს: „ამის გამო ავტომატურად დახარვეზებულად ჩაითვალნენ“.
მაკარიძე აღნიშნავს, რომ სასტუმროებში ძირითადი პრობლემა პერსონალის მოუმზადებლობა იყო.
„პერსონალი უნდა გადამზადდეს. სამზარეულოში და სასტუმროს ტერიტორიაზე მოქმედების წესები იცვლება, ამისთვის მზად თუ არ არიან, გაუჭირდებათ ნებართვის მიღება“.
სასტუმროების გახსნის გადაწყვეტილება, უწყებათაშორისმა საკოორდინაციო საბჭომ, ქვეყანაში ეპიდსიტუაციის გაუმჯობესების და კორონავირუსის შიდა გავრცელების რისკის შემცირების შემდეგ, 27 მაისს მიიღო.
აპლიკაციის შესავსებად ეწვიეთ ჯანდაცვის სამინისტროს
ვებგვერდს.
[მარიამ ბარძიმაძე,ახალციხე]