ბაკურიანს წყლის პრობლემის გამო ტურისტები ტოვებენ

ბაკურიანში, აღმაშენებლის ქუჩა # 88 ა – ში მდებარე საოჯახო სასტუმრო „Вakuriani House“, რომელიც 12 ნომრიანია, დღეს უკვე ორმა ოჯახმა დატოვა.

„სამი დღეა წყალი დღის განმავლობაში სამი საათით თუ მოდის, ღამე თიშავენ. გუშინ, დღის მეორე ნახევრიდან, დღეს დილამდე საერთოდ არ გვქონდა წყალი. ამის გამო დამსვენებლები შეწუხდნენ და დატოვეს სასტუმრო. დღეს ორი ოჯახი წავიდა, თუმცა სხვებმაც გამოთქვეს უკმაყოფილება და აპირებენ წასვლას,“ – ამბობს „Вakuriani House“–ის ადმინისტრატორი, ნინო ბიწაძე.

იგივე პრობლემების გამო ტოვებენ სასტუმრო „სნოუ პლაზას“ ტურისტები.

სასტუმრო „სნოუ პლაზა“ ბაკურიანში, კობა წაქაძის ქუჩაზე, ორ ნომერში მდებარეობს. სასტუმროში 40 სხვადასხვა ტიპის ნომერია. დღეის მონაცემებით „სნოუ პლაზა“ წყლის პრობლემის გამო, დაახლოებით, 15 ოჯახმა უკვე დატოვა.

სასტუმრო „სნოუ პლაზას „ ადმინისტრატორის მარინე ანანიკიანის თქმით – „უწყლობამ ყველაფრის პრობლემა შეგვიქმნა, რის გამოც 15 ოჯახმა ჩვენი სასტუმრო უკვე დატოვა“.

„სამხრეთის კარიბჭე“ დღეს დილიდან დაკავშირებას ცდილობს დაბა ბაკურიანის რწმუნებულთან, გოჩა გობრონიძესთან, თუმცა უშედეგოდ. ის, ამ დრომდე ჩვენს ზარს არ პასუხობს.

გაერთიანებული წყალმომარგების ცხელ ხაზზე აცხადებენ, რომ დაბა ბაკურიანში სამ ქუჩაზე: წაქაძეზე, აღმაშენებელსა და რუსთაველზე, ამ დრომდე წყლის მიწოდება შეზღუდულად ხდება.

„წყლის გაზრდილმა მოხმარებამ გამოიწვია წყლის ვარდნა, რის გამოც სამ ქუჩას წყალი შეზღუდულად მიეწოდება. პრობლემის აღმოსაფხვრელად მუშაობს ჩვენი ჯგუფები. გუშინდელმა შრომამ შედეგი გამოიღო და დღეს უკვე კურორტის 90%–ს დილის საათებში წყალი მიეწოდათ,“– განაცხადეს გაერთიანებულ წყალმომარაგებაში.

ბორჯომის მერის მოადგილე, ბუბა ბერიძე აღნიშნავს, რომ კურორტი მაქსიმალურად მზად შეხვდა სეზონს.

„ჩვენ მაქსიმალურად მზად შევხვდით ზამთრის სეზონს, მოწესრიგდა გზები, დასუფთავების კუთხით არ გვაქვს პრობლემები, გარე–ვაჭრობა შედარებით წესრიგშია. რაც მერიას ეხებოდა სეზონის დაწყებამდე მოგვარდა. წყალის პრობლემა გაერთიანებულ წყალმომარაგებას ეხება. როგორც ვიცი, ძალიან ბევრი სამუშაოები ჩატარდა დებეტის გაზრდასთან დაკავშირებით, თუმცა ამ დღეებში ყველაზე მეტი ტურისტი შემოდის და ყინვაც დაემთხვა, ამიტომ მოხდა ასე – წნევა დაეცა და მაღალ ადგილებზე ვერ მიეწოდა წყალი,“– ამბობს ბუბა ბერიძე.

მისივე განმარტებით, წყალმომარაგების წარმომადგენლები, 24 საათის განმავლობაში მუშაობენ, რათა პრობლემის დროული მოგვარება მოხდეს.

საქართველოს გაერთიანებული წყალმომარაგების კომპანიის ინფორმაციით, ხვალ, დილისთვის სავარაუდოდ, წყლის პრობლემა მოგვარდება.

[ნუკა სტეფნაძე, ბორჯომი]