ახალციხეში სასტუმროს გახსნის უფლება ხუთმა სასტუმრომ მიიღო

ახალციხის მერიის ეკონომიკური დაგეგმვის ადგილობრივი მოსაკრებლებისა და გადასახადების განყოფილების უფროსი, გიორგი თედორაძე იმ სამუშაო ჯგუფის წევრია, რომელიც განცხადების შესვლის შემდეგ სასტუმროებს ამოწმებს.

მისი თქმით, ამ დრომდე მათთან 12 განაცხადი შევიდა, აქედან მოგვიანებით ორმა უარი თქვა შემოწმებაზე, ხუთი სასტუმრო დახარვეზდა, ამდენივეზე კი გახსნის ნებართვა გაიცა.

„ხუთი სასტუმრო გაიხსნა, ესენია: ტიფლისი, რიო, პრესტიჟი, რაბათი და ნიუ გრანდი. დანარჩენ სასტუმროებს მცირე ხარვეზები ჰქონდათ და გამოსწორების შემდეგ თავიდან შევამოწმებთ“.

სასტუმროები ძირითადად ეკიპირების ფორმის არ ქონის გამო დახარვეზდნენ.

„არ ჰქონდათ ეკიპირება, მაგალითად თუ კორონავირუსისთვის დამახასიათებელი სიმპტომებით სტუმარი შემოვიდა, ამისთვის სპეციალური ინსტრუქციაა საჭირო. როგორ უნდა მოხდეს მასთან უერთიერთობა დააშ. ასევე ჭურჭლის სარეცხი ნიჟარები არ იყო მონიშნული. პირველი ნიჟარაში 40 გრადუსზე ირეცხება, ასევე მეორეშც, მესამეში კი 60 გრადუსზე“, - ამბობს თედორაძე.

სასტუმროებს ეკონომიკური საქმიანობის განახლებისთვის, ჯანდაცვის სამინისტროს ვებგვერდზე განაცხადის შევსება რვა ივნისიდან შეუძლიათ.

განაცხადის შევსების შემდეგ, ინფორმაცია ახალციხის ზედამხედველობის სამსახურს ეგზავნება, ისინი კი ამოწმებენ აკმაყოფილებს თუ არა სასტუმრო რეკომენდაციებს.

[მარიამ ბარძიმაძე, ახალციხე]