დასუფთავების მოსაკრებელი – რა თანხა შევიდა ადგილობრივებისგან ბიუჯეტში ერთ თვეში

თითქმის ათწლიანი პაუზის შემდეგ, ახალციხეში მცხოვრებლებმა დასუფთავების გადასახადის გადახდა ერთი თვეა რაც დაიწყეს. პირველი მაისიდან ამ დრომდე ქალაქში 6 000–მდე აბონენტიდან მერიიდან ქვითარი თითქმის ნახევარმა მიიღო.

„ქვითრები ჯერ სულ არ დარიგებულა, თუმცა პირველ რიგში ვეცადეთ, რომ თვითმმართველობის და ჩვენი ააიპ–ების თანამშრომლების ოჯახებში მიგვეტანა. არ გვინდა ვიღაცამ თქვას, რომ ჯერ თქვენ არ გადაგიხდიათ და ჩვენ რას გვთხოვთო“, – ამბობს ახალციხის მერიაში ეკონომიკური დაგეგმვის ადგილობრივი მოსაკრებლებისა და გადასახადების განყოფილების უფროსი გიორგი თედორაძე.

მისი თქმით, პირველი მაისიდან, ანუ მას შემდეგ რაც ქალაქში ქვითრების დარიგება დაიწყო ახალციხის მერიამ 2 962 ლარი ამოიღო: „ვფიქრობთ, რომ ეს არ არის ცუდი შედეგი და კიდევ უფრო გაუმჯობესდება“.

როგორც გიორგი თედორაძე ამბობს მონაცემთა ბაზა ამ დრომდე ზუსტდება: „დაახლოებით, ათი შემთხვევა გვქონდა, რომ მოქალაქე მოვიდა და სულადობის ჩასწორება მოგვთხოვა. ჩვენ ქვითარში მითითებული გვქონდა მაგალითად ოთხი სული და რეალურად სამია“.

ახალციხის მერიამ ახალციხეში მცხოვრებლებისგან დასუფთაების მოსაკრებლის ამოღება, პირველი მაისიდან დაიწყო. ამ დრომდე ადგილობრივები ქალაქში დასუფთავების გადასახადს არ იხდიდნენ.

[თამუნა უჩიძე, ახალციხე]