რა შემთხვევაში ვერ შეძლებენ სასტუმროები სტუმრების მიღებას

სასტუმროების სიას, რომლებსაც უკვე აქვთ შესაბამისი ნებართვა, ქვრივიშვილის თქმით, ადმინისტრაცია დღის ბოლომდე გაასაჯაროებს.

„თუკი განთავსების ობიექტი, როგორც მეწარმე, არ რეგისტრირდება, აქამდე არ არის დარეგისტრირებული ჯანდაცვის სამინისტროს შესაბამის ვებგვერდზე, მას არ ჰქონია დღევანდელ დღემდე ჩატარებული ინსპექტირება და ნებართვა არ აქვს მინიჭებული, ეს არის კანონდარღვევა. აქედან გამომდინარე, ერთ-ერთი რეკომენდაცია ჩვენი შიდა მოგზაურებისთვის არის ის, რომ ძალიან სწორად შეაფასონ ის ვითარება, რომელიც კოვიდ 19-თან მიმართებით გვაქვს და რა თქმა უნდა, იმოგზაურონ და განთავსდნენ ისეთ სასტუმროებში, რომლებიც შემოწმებულია და შესაბამისი ნებართვაც გაცემულია", - განაცხადა ქვრივიშვილმა.

მისივე თქმით, ინსპექტირება დასჭირდება საოჯახო სასტუმროებსაც.

„ჩვენ განსხვავება არ გვაქვს მიდგომებს შორის, ეს ეხება საოჯახო, საშუალო თუ მსხვილ სასტუმროებს. პრინციპი არის ერთი, რაც გულისხმობს სოციალურ დისტანცირებას, ზედაპირების ხშირ დამუშავებს, სამზარეულო ტერიტორიაზე განსაკუთრებულ ყურადღებას, ოთახების დალაგების პრინციპს," - განაცხადა ქვრივიშვილმა.

საქართველოს მთავრობის გადაწყვეტილებით, დღეიდან, 15 ივნისიდან ქვეყანაში შიდა ტურიზმი დაიწყებს ფუნქციონირებას, პირველი ივლისიდან კი საერთაშორისო ტურიზმი.

[რობი ზარიძე]