რა შემთხვევაში გააგრძელებენ კომპანიები მუშაობას – ეკონომიკის მინისტრის განმარტება

„ძალიან კარგად მესმის რომ ბევრ ბიზნესს, რომლის შეზღუდვაც გვიწევს, შეექმნა პრობლემები, სერიოზული დისკომფორტი. ჩვენ ყველაფერს ვაკეთებთ იმისთვის რომ ეს დისკომფორტი იყოს დროებითი და აწყობილი სისტემის ფარგლებში შევთავაზოთ მათ კონკრეტული სტანდარტები, რაც მათ უნდა დააკმაყოფილონ და ამ სტანდარტების გადამოწმების კვალობაზე მათ შეძლონ კვლავ იფუნქციონირონ“, – განაცხადა ნათია თურნავამ.

მისი თქმით, ეს შეეხება როგორც სამშენებლო კომპანიებს ასევე სხვა დანარჩენ ბიზნესს, ასევე შეეხება ონლაინ გაყიდვებსაც, ვინც არასასურსათო პროდუქციის საბითუმო მიწოდებას ვერ ახერხებს.

მეწარმე სუბიექტებმა, სამშენებლო კომპანიებმა, სამშენებლო მასალებისა და საბითუმო ვაჭრობის მწარმოებელმა კომპანიებმა, რომლებსაც საქართველოს მთავრობის დადგენილებით შეეზღუდათ საქმიანობის განხორციელების უფლებამოსილება, საგანგებო მდგომარეობის პერიოდში შესაბამისი პირობებით ფუნქციონირების უფლების მისანიჭებლად საქართველოს ეკონომიკისა და მდგრადი განვითარების სამინისტროს ოფიციალური ვებ-გვერდებიდან (www.economy.ge) უნდა ჩამოტვირთონ სარეგისტრაციო ფორმა, შეავსონ და გამოაგზავნონ ელექტრონული ფოსტის მისამართზე - construction@moesd.gov.ge; ხოლო ქ. თბილისის ადმინისტრაციულ საზღვრებში მშენებლობის უფლების გაგრძელებისთვის უნდა მიმართონ თბილისის მუნიციპალიტეტის მერიას მისამართზე - build@tbilisi.gov.ge.

„აპლიკაციის ფორმები უკვე ატვირთულია ეკონომიკის სამინისტროს ვებგვერდზე. მარტივი ფორმებია, სადაც იქნება ასახული კონკრეტული კომპანიის მზადყოფნა რომ დაიცვან თავისი მომხმარებლები და თანამშრომლები, შექმნილია მობილური ჯგუფები რომელშიც მონაწილეობს ჯანდაცვის სამინისტროს და ეკონომიკის სამინისტროს ტექინსპექცია და შესაბამისი მუნიციპალური ინსპექციები. ეს იმისთვის გაკეთდა, რომ ჩვენ რესურსი გვეყოს და სწრაფად გადავამოწმოთ მრავალი ბიზნესი ერთდროულად. როგორც კი ვრწმუნდებით კონკრეტულ ბიზნესში დაცული არის მარტივი ელემენტარული პირობები, რომლებიც დადგენილია ჯანდაცვის სამინისტროს მიერ ჩვენ ამას წარვუდგენთ საგანგებო შტაბს და მიღებული იქნება გადაწყვეტილება“, – განმარტავს თურნავა.

მინისტრის განმარტებით, რა თქმა უნდა ამას დასჭირდება დრო, რამდენიმე დღე, ან კვირა.

„ეს ის ერთი–ორი კვირაა, რომელიც ყველას ჩვენ გვჭირდება რომ დავყოთ სახლებში. ასე რომ ჩავთავალოთ რომ ეს არის აუცილებელი მსხვერპლი რასაც ბიზნესები გაიღებენ იმისთვის, რომ დავრჩეთ უსაფრთხოდ. ეს ბიზნესი იქნება უფრო მეტად კონკურენტული, რომელიც იქნება უსაფრთხო. ეს იქნება ახალი კრიტერიუმი“, – განაცხადა ნათია თურნავამ.

[რობი ზარიძე, ახალციხე]