აბასთუმნის ტყეში ხანძრის ახალი კერა გაჩნდა

საგანგებო სიტუაციების მართვის სამსახურის ინფორმაციით, ხანძრის ახალი კერა აბასთუმანში ობსერვატორიის მიმდებარედ გაჩნდა. ადგილზე მეხანძრეები არიან მობილიზებული და მიმდინარეობს სალიკვიდაციო სამუშაოები.

„გავრცელების საფრთხე არ არსებობს, უკვე ლოკალიზებულია“, - გვითხრეს საგანგებო სიტუაციების მართვის სამსახურში.

ობსერვატორიის თანამშრომლის ოთარ კვარაცხელიას თქმით, ხანძარი ობსერვატორიის ტერიტორიაზე არაა.

„დილით სახანძრო მანქანები წავიდნენ. ეს სულ სხვა ტერიტორიაა, სადაც გუშინწინ გაჩნდა ის ადგილი არ არის. ამ ადგილს „ტრაპეციას“ ეძახიან. ზეკარის გადასასვლელისკენ, ქუთაისისკენ რომ გზა მიდის იმ მიმართულებითაა“, - ამბობს კვარაცხელია.

ადიგენის მერის ზაქარია ენდელაძის თქმით, ხანძარი ამჯერად უფრო ნაკლებ ფართობზეა გავრცელებული.

„დილით დაკვამლიანება შეინიშნებოდა, ახლა როგორც ვიცი მცირე ფართობზეა გავრცელება, სადღაც 33-30 კვმ“, - განაცხადა ენდელაძემ.

მისივე თქმით, ხანძარი ნაწვიმარზე გაჩნდა – „რამდენჯერმე იწვიმა ჩვენთან, ახლა საფრთხე აღარ არსებობს მიმდინარეობს სალიკვიდაციო სამუშაოები“.

აბასთუმნის ტყეში ხანძარი გაჩნდა

[მარიამ ბარძიმაძე, ადიგენი]