რეგიონული ენების შესახებ ევროპულ ქარტიაზე პარლამენტში კონსულტაციები მიმდინარეობს

ინფორმაციას news.ge ავრცელებს.

ბესელიას თქმით, ექსპრეზიდენტმა მიხეილ სააკაშვილმა ამ კუთხით, ნეგატიური პიარი აწარმოა, რამაც საზოგადოებაზე ცუდი გავლენა მოახდინა.

„ჩვენ ამ საკითხზე გვაქვს დისკუსია და კონსულტაციები როგორც შიგნით, ასევე გვაქვს ევროპის საბჭოსთანაც, რომლის წინაშეც არის აღებული ეს ვალდებულება. ამ საკითხთან დაკავშირებით ვფიქრობ, რომ პირველ რიგში არის საჭირო მოსახლეობასთან გარკვეული საგანმანათლებლო ინფორმაციული სამუშაოების ჩატარება. სააკაშვილმა სამწუხაროდ ძალიან ნეგატიური პიარი დაიწყო. გემახსოვრებათ ცოტა ხნის წინ ისეთი სიუჟეტები იყო გაშვებული მედიაში, სადაც სააკაშვილის წარმომადგენელი განმარტავდა და ძალიან ნეგატიურ კომენტარებს აკეთებდა, რომლის დროსაც მან აღნიშნა რომ ეს არის სამშობლოს ღალატი და ეს სახელმწიფო ინტერესების საწინააღმდეგო მოქმედებაა. ამან, რა თქმა უნდა, საზოგადოებაზე ძალიან ცუდად იმოქმედა", - განაცხადა ბესელიამ.

ბესელია აცხადებს, რომ საზოგადოებას უნდა განემარტოს რა არის ქარტია, რას ნიშნავს იგი, რა დატვირთვის მატარებელია: "ჯერ სამუშაოები იქნება ჩასატარებელი, რომ ჩვენ მოვემზადოთ შემდეგ განხილვებისთვის".

ადგილობრივ თვითმმართველობათა ეროვნული ასოციაციის აღმასრულებელმა დირექტორმა დავით მელუამ განმარტა, რომ ახალქალაქი, რომელიც სომეხი ეროვნების ადამიანებითაა დასახლებული, ამ ქარტიის ფარგლებში ვერ ჯდება.

"ამ ქარტიაში ახალქალაქი ვერ ეტევა. თუ გვინდა, მაინც ჩავტიოთ, ახალქალაქის და ჯავახეთის სომხობამ არ უნდა მოახდინოს თვითიდენტიფიცირება სომხურ ეთნოსად და უნდა ვთქვათ, რომ გვქვს ახალი ეთნოსი - ჯავახი, ისევე როგორც აფხაზეთში. ყველა სხვა შემთხვევაში, ეს იქნება ქარტიის პრინციპების თავისუფალი ინტერპრეტირება", - აღნიშნავს მელუა.

[SKnews.ge]