ბესელიამ 'ოცნება' დატოვა, ფოფხაძე ტოვებს თუ არა უმრავლესობას 25 თებერვალს განაცხადებს

"ამ გადაწყვეტილების შემდეგ მე ვრჩები პარლამენტში, როგორც დამოუკიდებელი დეპუტატი, დაველოდები როგორი იქნება ჩემი კოლეგების შემდეგი გადაწყვეტილება, რომელთაც აქვთ პროტესტი იმ ყველაფრის მიმართ, რაც საკანონმდებლო ორგანოში და მმართველი პარტიის შიგნით ხდება. დაველოდები იმ გადაწყვეტილებებს, რომელსაც ისინი უახლოეს დღეებში მიიღებენ", – ამბობს ეკა ბესელია.

გედევან ფოფხაძე აცხადებს, რომ ის ბესელიას მეგობარია და ამ საკითხთან დაკავშირებით მას სურს რომ გააზრებული და არგუმენტირებული პრესკონფერენცია გამართოს: "კიდევ ერთხელ ვადასტურებ, რომ ვარ ეკა ბესელიას მეგობარი. ჩვენ ბევრი რამე გვაქვს ერთად გამოვლილი და მიმაჩნია, რომ მისი გადაწყვეტილება “ქართული ოცნებისთვის” უნდა იყოს ძალიან დამაფიქრებელი. ეს არის ნიშანი იმისა, რომ “ქართული ოცნება” დაშორდა ღირებულებებს. მინდა, მშვიდ, წყნარ ატმოსფეროში გავაკეთო განსაკუთრებული, გააზრებული და არგუმენტირებული ბრიფინგი, სადაც მომეცემა საშუალება, სრულად გავშალო ის თემები, რაც ბოლო პერიოდში და ცოტა უფრო ადრე ხდებოდა”, – განაცხადა გედევან ფოფხაძემ.

გუშინ, 21 თებერვლას უმრავლესობამ ჩააგდო ბესელიას და რვა დეპუტატის მიერ მომზადებული კანონპროექტი, რომლის მიხედვითაც სასამართლოს პირველ და მეორე ინსტანციებში მოსამართლეების უვადოდ დანიშვნა 2025 წლამდე უნდა შეჩერებულიყო. ეკა ბესელია ამბობდა, რომ ეს კანონპროექტის მისთვის გადამწყვეტი იყო.

[sknews.ge]