ახალციხის საზოგადოებრივ ტრანსპორტში მგზავრების ნაწილს პირბადე არ უკეთია

ახალციხეში საზოგადოებრივმა ტრანსპორტმა მუშაობა რვა დღის წინ განაახლა. მიკროავტობუსები მუნიციპალიტეტის თითქმის ყველა სოფლის მიმართულებით მოძრაობენ.

„სამხრეთის კარიბჭემ“ ახალციხის ავტოსადგურზე დააფიქსირა არაერთი ფაქტი, სადაც ჩანს, რომ მგზავრები პირბადეებს არ იყენებენ.

„ვიცით რომ უნდა გვეკეთოს, უბრალოდ სიცხის გამო სული გვეხუთებოდა და მოვიხსენით. ერთმანეთთან ახლოს არ ვსხედვართ“, - გვითხრეს წინუბნის მიკროავტობუსის მგზავრებმა.

მგზავრების ნაწილი კი ფიქრობს, რომ ტრანსპორტში ვირუსის გავრცელების რისკი ნაკლებია, რადგან ფანჯრები ღიაა და ნიავდება.

ახალციხეში სატრანსპორტო კომპანია "ჯეოტივის" ხელმძღვანელის, ნუგზარ მამუკაშვილის განმარტებით, გაფრთხილება, რომ მგზავრებს პირბადე აუცილებლად უნდა ეკეთოთ, ყველა ტრანსპორტშია გამოკრული. რეგულაციების აღსრულებაზე კი მძღოლებმა უნდა იზრუნონ.

წინუბნის მიკროავტობუსის მძღოლი ტარიელ მჭედლიძე ამბობს, რომ მგზავრებს ყოველთვის აფრთხილებს რომ პირბადე გაიკეთონ.

მთავრობის გადაწყვეტილებით, კორონავირუსის პრევენციის მიზნით, მიკროავტობუსში მგზავრი ვალდებულია პირბადე ეკეთოს. ტრანსპორტის ფანჯრები კი ღია უნდა იყოს. ახალი რეგულაციებით ასევე არ შეიძლება ფეხზე მდგომი მგზავრის გადაყვანა.

დახურულ სივრცეში ავტობუსებსა და ტაქსებში პირბადის გარეშე მყოფი ფიზიკური პირების დაჯარიმების შესახებ ანრი ოხანაშვილმა და პარლამენტის სხვა წევრებმა კანონპროექტი შეიმუშავეს, რომლის მიხედვითაც, დახურულ სივრცეში პირბადის გარეშე გადაადგილების შემთხვევაში ფიზიკური პირისთვის ჯარიმა 50 ლარი იქნება, იურიდიული პირებისთვის კი 500 ლარი.

საქართველოში მუცნიციპალური ტრანსპორტის მუშაობა 29 მაისიდან აღდგა.


[მარიამ ბარძიმაძე, ახალციხე]